A Xunta de Goberno extraordinaria da Deputación de Ourense celebrou hoxe, vía telemática, a súa correspondente reunión semanal, na que o presidente Manuel Baltar anunciou que o goberno provincial está a impulsar unha medida de gran transcendencia económica para os concellos, que lles permite facer fronte desde o ámbito local e con maior fortaleza á pandemia de coronavirus, afirma Baltar.
Trátase dunha inxección de liquidez de oito millóns de euros, un montante económico que a Deputación de Ourense anticipa aos concellos que teñen delegada no ente provincial a recadación de impostos e que previamente solicitasen o reintegro deste anticipo.
Desta maneira, a Deputación de Ourense actúa como unha banca provincial nunha situación de emerxencia sanitaria, social e económica como a que vivimos; o obxectivo é cooperar ao máximo cos concellos e facelo con todos os instrumentos de que dispomos como goberno provincial, para que poidan facer fronte tamén eles desde o ámbito municipal á emerxencia que estamos a vivir, explica Manuel Baltar.
O presidente da Deputación afirma que esta medida está a ser moi ben acollida polos concellos, porque lles permite dispor de fondos para levar a cabo iniciativas dirixidas a combater a pandemia do coronavirus nos seus ámbitos locais e actuar con toda a previsibilidad posible desde o punto de vista económico.
De feito, desde datas previas á declaración da pandemia e durante as próximas semanas, a institución que preside Manuel Baltar anticipa aos gobernos locais que o soliciten a recadación de impostos de todo o ano 2020. Até agora, esta inxección de liquidez supuxo para os concellos da provincia de Ourense ingresar un catro millóns de euros (3.945.200) e cabe a posibilidade de anticipar outro catro millóns máis aos restantes concellos que teñen delegada ditas taxas na Deputación e que soliciten o reintegro deste anticipo.
Os anticipos a concellos -como sempre foi o compromiso provincial- teñen custo cero, dado que se conceden sen interese financeiro algún. Ademais, o presidente da Deputación de Ourense comprométese a facer efectivos estes anticipos sen dilación, nun prazo de 48 horas.
Por outra banda, na reunión da Xunta de Goberno informouse da reunión celebrada onte polo Comité de seguimento da crise do COVID-19 na provincia de Ourense, na que se deu a coñecer que a Deputación aprobará este mes novas medidas económicas e de apoio no marco da crise do coronavirus, e onde Baltar informou de que convocará neste mes de abril un pleno extraordinario da corporación provincial. Tamén se deu conta na Xunta de Goberno dos puntos da orde do día establecidos, aprobándose os investimentos, servizos e iniciativas de cooperación con concellos previstos para esta reunión.
