O presidente da Deputación de Ourense visitou as instalacións do centro cultural “Marcos Valcárcel”, no que xa se comezou a instalar a conexión a internet e comezou a recibir o material que se instalará para albergar espazos gratuítos de oficina para autónomos e pequenos empresarios da provincia, afectados economicamente pola crise do COVID-19.
A medida, para a que xa está aberto o prazo de solicitudes, ten como obxectivo axudar durante tres meses a empresarios e emprendedores que non poden pagar alugueres e que ven perigar a súa actividade laboral por mor da crise.
VIDEO
Permitirá habilitar espazos para 40 postos de oficina, cada un dos cales dispoñerá de conexión a Internet e mobiliario básico de oficina, instalado cumprindo a normativa de seguridade referida á prevención do COVID-19.
