O subdelegado do Goberno e o Director de Produción do SIEPSE visitan onde se emprazará a Unidade de Custodia Hospitalaria

subdelegado goberno

O subdelegado do Goberno en Ourense, Emilio González Afonso, e o Director de Produción da Sociedade de Infraestruturas e Equipamentos Penitenciarios e da Seguridade do Estado (SIEPSE), Juan José Torrejón, realizaron durante a mañá de hoxe unha visita ás instalacións do Complexo Hospitalario Universitario de Ourense (CHUO) nas que se vai emprazar a Unidade de Custodia Hospitalaria (UCH).

Durante a visita, previa á formalización da acta de replanteo, estiveron acompañados polo Xerente da Área Sanitaria de Ourense, Verín e Valdeorras, Félix Rubial; polo Director do Centro Penitenciario de Pereiro de Aguiar, Francisco González; pola Administradora do Centro Penitenciario, Lorena del Pozo; e polo presidente de EXTRACO, Pablo Prada, empresa encargada das obras.

AVANTAR ACTIVIDADES

As obras da Unidade de Custodia Hospitalaria (UCH) comezarán nos vindeiros días e teñen un prazo de execución de cinco meses, ascendendo o seu valor a 370.016,79 euros (impostos engadidos).

O subdelegado do Goberno sinalou que se trata dunha obra que permitirá tanto a mellora da atención hospitalaria aos internos do Centro Penitenciario de Pereiro de Aguiar como do traballo dos sanitarios e dos axentes dos Corpos e Forzas de Seguridade do Estado encargados da súa custodia.

UNIDADE DE CUSTODIA HOSPITALARIA DO CHUO

A Unidade de Custodia Hospitalaria do CHUO constará dun total de catro habitacións, dunha sala de espera, dunha sala de control para o Corpo de Seguridade, aseos e duchas, sendo a superficie total de 218 metros cadrados.

A Unidade contará con modernos sistemas de seguridade que permitirán o control dos internos e das visitas, garantindo a máxima seguridade e independencia respecto ao resto de zonas do Complexo hospitalario. En todo momento o enfermo está en comunicación co posto de enfermería e co posto de control das Forzas de Seguridade do Estado que o custodian.