Inicio Política Bng de Celanova : “Pérez Cortés cobra da Mancomunidade (1.600 €) e...
- O BNG vota en contra do orzamento da entidade supramunicipal por “opacos” e denuncia “o abuso dos cartos públicos que fai o clan Cortés co beneplácito do padriño Baltar”.
- O PP intenta forzar a unanimidade nunha moción para descargar no Goberno central a responsabilidade sobre a xestión da auga do Concello da Merca. BNG e PSOE abstéñense, e Celanova Decide vota cos populares.
O presidente da Mancomunidade Terra de Celanova cobra 1.600 euros de salario da entidade e ademais das “dietas” do Concello de Quintela de Leirado. Segundo o informe dun medio de comunicación sobre os salarios dos alcaldes da provincia, Pérez Cortes estaría cobrando mensualmente do Concello de Quintela axudas de custo por tres conceptos: asistencia ao concello, asistencia a comisións e asistencia a plenos. Os ingresos recibidos por Pérez Cortés das dúas “caixas” públicas están ao redor dos 3.000 euros mensuais.
“Cobro da Mancomunidade porque tamén me poden chamar ás seis da mañá”, respondeu con evidente enfado José Antonio Pérez Cortés tras facer público o dato do que percibe mensualmente respondendo unha pregunta de Leopoldo Rodríguez (BNG), quen solicitou a cifra dado que “é imposíbel de atopar nos orzamentos” do organismo. A pregunta molestou á bancada popular.
Non foi o único momento tenso no pleno de aprobación dos orzamentos da Mancomunidade, votación sobre a que o PP aplicou a súa maioría, mais tivo que escoitar as críticas (as únicas críticas, porque o resto de grupos calaron) por parte do Bloque Nacionalista Galego, que conta con tres representantes no pleno. Os tres votaron en contra das contas, como xa o fixera José Antonio Pérez Valado, alcalde nacionalista de Verea, na xuntanza previa o pleno.
PUBLICIDADE ELECTORAL
O BNG argumentou a súa negativa na falta de transparencia, eficiencia e control do gasto, que se expresa singularmente no incumprimento reiterado por parte dos horarios, na insistencia en non consorciar o servizo de bombeiros como se fixo noutras comarcas, na toma de decisións unilaterais por parte da presidencia do PP sen consultar ao resto dos alcaldes ou na inestabilidade que crea nas contas dos concellos a xestión irregular. “Os alcaldes son meros pagadores, sen opción ningunha a participar das decisións e sen poder fiscalizar en que gasta vostede, señor presidente, os cartos que relixiosamente achegan os concellos, máis de 600.000 euros cada ano no caso de Celanova, por exemplo”, subliñou Leopoldo Rodríguez na defensa da posición do BNG.
Leopoldo Rodríguez denunciou que na Mancomunidade actúa “o clan Cortés co beneplácito do padriño Baltar, con opacidade e uso abusivo dos recursos públicos, baixo a sombra do nepotismo na selección de persoal, algo que non mudou, como non mudan os seus orzamentos, que son os orzamentos do clan, non os orzamentos das veciñas e veciños das terras de Celanova”.
O PP fracasa en utilizar a Mancomunidade para lavar a cara á xestión da auga na Merca
O PP tamén fracasou á hora de lograr un apoio unánime do pleno a unha moción que o PP da Merca presentou para descargar a súa responsabilidade na xestión do servizo de auga -deixando sete meses sen auga potábel ás veciñas e veciños de todas as parroquias- no Goberno central a través dunha reclamación á Confederación Hidrográfica Miño-Sil.
Os populares mesmo forzaron unha votación da súa proposta despois de que o pleno tivese votado adiar o debate do asunto para o seguinte pleno. Por parte do BNG, José Antonio Pérez Valado propuxo unha emenda na que ampliaba á reclamación do coidado dos ríos ao coidado dos servizos de abastecemento interpelando tamén á Xunta de Galiza, algo o que se negou o PP.
O alcalde popular de Cartelle e a alcaldesa en funcións da Merca insistiron en que se votase a moción do PP. O BNG e o PSOE -onde a alcaldesa de Ramirás recoñeceu que tamén teñen problema co arsénico e a culpa non lla botan á CHMS- abstivéronse, e Celanova Decide (CD) votou co PP.
Pérez Valado (BNG) impulsa unha reunión de alcaldes para falar sobre a xestión dos servizos
O alcalde de Verea, José Antonio Pérez Valado (BNG), arrancou o compromiso da presidencia de que os alcaldes dos oito concellos da Mancomunidade manterán unha xuntanza, “dentro dun mes ou mes e medio” -asegurou Pérez Cortés-, para debater sobre a xestión e as posibilidades de mellora dos servizos que presta a entidade supramunicipal.
O nacionalista xa reclamou esa medida na xuntanza previa o pleno deste martes. “O 19 de novembro pedín termos unha reunión para reconducir isto e que os alcaldes fagamos parte do deseño e das decisións a respecto dos servizos. Hoxe [por onte] volvo pedir abrir o debate sobre os servizos, empezando polos de Axuda a Domicilio, sentarnos é ver que é mellorábel”, dixo o alcalde de Verea.
