O Partido Popular presenta unha batería de propostas para os orzamentos de Ribadavia

O grupo municipal do Partido Popular de Ribadavia ven de presentar un documento con diferentes aportacións ao borrador de orzamento para 2021 presentado polo goberno municipal. Nese borrador o goberno municipal apenas introduce novidades ao respecto do documento que elaborara o goberno popular antes da presentación da moción de censura por parte do actual bipartito. De feito, afirman que o documento recolle aspectos como a mellora das condicións de traballo do grupo de emerxencias supramunicipal, e a dotación dunha nova sede para este grupo, tal e como xa estaba acordado cos traballadores polo goberno do Partido Popular.

Tamén, afirman que se consolidan servizos creados polo goberno municipal do PP coma é o caso do servizo de madrugadores ou a aula municipal de teatro, servizos que se crearon coa chegada dos populares ao goberno do Concello de Ribadavia.

AVANTAR ACTIVIDADES

Aínda así, os populares presentaron un documento coas seguintes propostas para reforzar o documento orzamentario presentado polo goberno municipal:

  1. Ampliación da partida destinada á dotación de material para a loita contra o COVID-19 ata os 10.000€.
  2. Creación dunha partida específica para plan de emprego dotada con 25.000€ e aumento da parte proporcional das cuotas á seguridade social (9.000€) na partida existente para esta finalidade. Esta medida enténdese en conxunto co mantemento da partida de 45.000€ que en orzamentos anteriores estaba destinada a colaboración social e á que agora se lle cambiou a denominación pola de Plan de Emprego. Deste xeito, a dotación orzamentaria para Plan de Emprego e Colaboración social ascendería a 70.000€.
  3. Reforzo do servizo de limpeza viaria a través do aumento da xornada laboral de todos os traballadores deste servizo que non teñen xornada completa.
  4. Destinar ao programa de subvencións a autónomos o 1% do orzamento municipal, é dicir, incrementar esta partida dotada no borrador con 30.000€ ata os 47.497,08€
  5. Adherirse ao convenio coa Xunta de Galicia para participar no Plan autonómico de rescate ao sector da hostelería.
  6. Partida orzamentaria para levar a cabo as actuacións precisas para garantir o abastecemento de auga da localidade de Santo André de Camporredondo coa actual traída veciñal.

Con estas propostas, o grupo municipal do Partido Popular de Ribadavia pretende enriquecer un documento orzamentario que, a pesar de recoller moitas das partidas, dos investimentos e dos servizos que puxeron en marcha os populares, non é o suficientemente ambicioso para atender necesidades importantes para Ribadavia.