A Xunta sacará á venda a partir de mañá case 282.000 m2 de solo empresarial con bonificacións de ata o 50%
O director do Instituto Galego da Vivenda e Solo, Heriberto García, visitou hoxe o polígono do Barco de Valdeorras xunto ao alcalde, Alfredo García, e empresarios da zona
Na convocatoria deste ano inclúense 17 parques industriais xestionados polo IGVS nos que se porán a disposición un total de 116 parcelas urbanizadas
O responsable autonómico anuncia que a revisión do Plan sectorial de ordenación de áreas empresariais promovida pola Xunta introducirá cambios substanciais respecto ao futuro desenvolvemento do parque da Raña, que se ampliará en case 70.000 m2
O Diario Oficial de Galicia publicará mañá a resolución pola que se anuncia un novo concurso de venda de solo empresarial con bonificacións de ata o 50% nos parques que xestiona o Instituto Galego da Vivenda e Solo (IGVS). Serán en total 116 parcelas que suman unha superficie de preto de 282.000 metros cadrados e se distribúen en 17 polígonos.
Así o avanzou hoxe o director do IGVS, Heriberto García, durante unha visita ao parque empresarial da Raña, no Barco de Valdeorras, na que estivo acompañado polo rexedor municipal, Alfredo García, e representantes de dúas asociacións de empresarios da zona aos que lles anunciou que a Xunta ofertará neste polígono 13 parcelas con case 37.600 m2 e un desconto sobre o prezo de venda do 50%.
Cómpre subliñar que este é o segundo concurso que convoca o Goberno galego este ano co fin de mobilizar o solo industrial que ten dispoñible nos seus parques e facilitarlles así ás empresas que queiran asentarse na Comunidade ou ampliar as súas instalacións, terreos urbanizados e en localizacións axeitadas ás súas necesidades.
Neste sentido, Heriberto García explicou que, ao igual que no concurso convocado en marzo por Xestur, as parcelas que o IGVS sacará á venda mañá terán un desconto do 30% ou do 50%, dependendo da súa localización. Así, o importe total das bonificacións que ofrece a Xunta para adquirir estas 116 parcelas ascende a 5,76 millóns de euros.
En caso de que algún dos terreos dispoñibles non se venda no marco do concurso, aclarou que o IGVS poderá adxudicalos de forma directa e respectando sempre as condicións orixinais ou ben asignalos na modalidade de dereito de superficie, é dicir, a cambio do pagamento dun canon anual moi reducido con opción de compra.
Así mesmo, o director do IGVS aproveitou a súa visita para explicarlles aos representantes do Concello e dos tecido empresarial local que a modificación do Plan sectorial de ordenación de áreas empresariais de Galicia (PSOAEG) traerá novidades importantes para o municipio. Así, tras indicar que esta será a segunda revisión que acometa a Xunta deste documento de planificación aprobado en 2014, Heriberto García explicou que os cambios afectarán de forma directa ou indirecta ao desenvolvemento industrial de 22 municipios, entre eles O Barco, que sufrirá unha modificación “substancial” do seu parque, que se traducirá en case 70.000 m2 máis de superficie cara ao sur.
En concreto, no novo PSOAEG eliminaranse as fases IV e V do polígono da Raña —cun total de 118.866 m2 e localizadas en zonas inundables— ao tempo que se incorporarán novos terreos noutro ámbito. Como resultado destes cambios, o parque empresarial sufrirá unha ampliación xa que a nova superficie prevista será de 186.912,45 m2.
No seguinte cadro recóllese o detalle por parques empresariais do número de parcelas, superficie e bonificacións a aplicar no marco do concurso que sairá publicado mañá:
PARQUE | PARCELAS | SUPERFICIE m² | PREZO BONIFICADO € | % BONIFICACIÓN |
As Somozas | 4 | 68.600,00 | 670.404,67 | 50 |
Melide | 2 | 4.680,00 | 166.720,06 | 30 |
Pontedeume | 1 | 1.139,00 | 23.236,06 | 50 |
Touro | 4 | 2.941,00 | 94.744,48 | 30 |
Culleredo | 1 | 4.700,00 | 28.176,95 | 30 |
Bóveda | 6 | 4.643,00 | 50.456,31 | 50 |
Lourenzá | 7 | 8.855,44 | 197.027,95 | 50 |
Monforte | 13 | 53.993,00 | 1.633.838,00 | 50 |
Monterroso | 22 | 39.403,00 | 687.601,20 | 50 |
Quiroga | 9 | 6.401,00 | 131.220,50 | 50 |
Taboada | 13 | 13.717,50 | 461.060,25 | 50 |
Xermade | 12 | 11.126,00 | 130.713,38 | 50 |
O Barco | 13 | 37.593,00 | 1.052.604,00 | 50 |
Carballiño | 3 | 9.117,79 | 179.535,53 | 50 |
Celanova | 1 | 3.274,00 | 47.882,25 | 50 |
Ribadavia | 1 | 1.880,32 | 57.161,73 | 50 |
Verín | 4 | 9.657,59 | 317.273,38 | 50 |
TOTAL GALICIA | 116 | 281.721,64 | 5.929.656,70 |