Manuel Baltar aposta polo PP como “o partido das solucións fronte ao desamparo do goberno de Sánchez”

Tralo tradicional acto de inicio do curso político dos populares galegos en Cerdedo-Cotobade

·      O candidato á relección no Congreso Provincial do 26 de setembro pediu para o executivo socialista e comunista “o castigo das urnas nas municipais de 2023, logo de atentar contra a autonomía dos concellos e das deputacións”

AVANTAR ACTIVIDADES

Manuel Baltar, presidente en funcións do Partido Popular de Ourense e candidato á relección no Congreso Provincial do próximo 26 de setembro, definiu hoxe ao PP como “o partido das solucións fronte ao desamparo do goberno de Sánchez, que só merece o castigo das urnas nas eleccións municipais de 2023 logo de deixar no máis absoluto desamparo ás entidades locais, atentando contra a autonomía dos concellos e das deputacións”.

Tralo tradicional acto de inauguración do curso político que o PPdeG celebra en Cerdedo-Cotobade, coa participación dos presidentes autonómico e nacional, Alberto Núñez Feijóo e Pablo Casado, o líder dos populares ourensáns afirmou que o PP “só pensa en garantir solucións para os cidadáns construíndo un partido sólido, como demostraremos logo do congreso provincial de setembro, facendo así a nosa achega para un próximo goberno de España con Pablo Casado como presidente”.

Baltar defendeu a fortaleza dun PP que constitúe “a única alternativa ao caos dun executivo socialista e comunista que perde a súa credibilidade a anacos en cada decisión que adopta”, citando como exemplos o aumento do recibo da luz, as cesións aos independentistas, a nefasta xestión da pandemia ou a nula e errada política internacional.