O delegado territorial da Xunta en Ourense, Gabriel Alén, sinalou ao enoturismo galego como un elemento protagonista na promoción e na imaxe de destino sustentable que contribúe á desestacionalización, e que axuda a diferenciar a oferta da comunidade e a promover Galicia como un destino confiable e de calidade.
O delegado territorial, que participou esta mañá na presentación das Xornadas de Portas Abertas da Ruta do Viño do Ribeiro xunto ao vicepresidente da Deputación Provincial de Ourense, César Fernández, e ao presidente do Consello Regulador da Denominación de Orixe Ribeiro, Juan Manuel Casares, explicou que esta nova edición, a décima, “acontece plenamente consolidada, cun incremento das adegas participantes, da duración do programa e coa ampliación das actividades complementarias propostas”.
Deste xeito, do 22 ao 24 de outubro, -continuou Gabriel Alén- aqueles que se queiran achegarse ata os territorios do viño do Ribeiro poderán facer visitas guiadas e de balde nas adegas participantes e poderán aloxarse nos aloxamentos turísticos adheridos, degustar menús especialmente creados para a ocasión nos establecementos de restauración do programa ou participar no programa de actividades especiais deseñadas para a ocasión: paseos en barca, catas comentadas, sendeirismo ou visitas a museos, entre outras.
Todas elas, ademais, concibidas para ser gozadas en pequenos grupos e previa reserva, co obxectivo de seguir dándolle cumprimento ás medidas preventivas e de seguridade derivadas da crise sanitaria, garantindo así un enoturismo seguro
Bus do Viño
Estas medidas de limitación de aforamento tamén se manterán no servizo de buses do viño que volverá a poñerse en marcha para os participantes que queiran realizar as visitas ás adegas, museos e outros lugares de interese. En total haberá 38 buses, con diferentes rutas e saídas, que estarán sempre acompañados por un guía turístico e cun aforamento limitado ao 60% da capacidade de cada bus, garantindo así as distancias de seguridade.
Sorteos nas redes sociais
Ademais, co obxectivo de dar a coñecer a iniciativa, Turismo de Galicia está a sortear a través do seu facebook un total de 15 premios, tres por cada ruta do viño, consistentes nunha noite de aloxamento e un xantar para dúas persoas nos establecementos asociados.
Pódese consultar toda a información relativa ás xornadas na web de Turismo de Galicia e afondar nos recursos enoturísticos na app Enoturismo de Galicia, que conta con información precisa de cada recurso en galego, castelán e inglés.
