Manuel Baltar preside o Día Europeo do Patrimonio Termal promovido pola EHTTA

O presidente da Deputación de Ourense e presidente da Asociación Europea de Cidades Históricas Termais, inaugurou esta xornada que naceu no ano 2018 para resaltar a importancia do patrimonio termal como unha tradición centenaria en toda Europa

Este evento, organizado por Wiesbaden, é o primeiro de varios que se centrarán nas “Paisaxes Terapéuticas” e que comeza analizando o “Urbanismo Termal” nunha cidade que é “un gran exemplo de que as cidades termais foron creadas para mellorar a saúde física e mental dos seus visitantes, involucrando aos habitantes e convidados nun proceso sostible do que aínda hoxe, centos de anos despois, podemos gozar”, destacou Baltar

AVANTAR ACTIVIDADES

O presidente da Deputación de Ourense, Manuel Baltar, inaugurou hoxe, na Kurhaus de Wiesbaden (Alemaña), como presidente da Asociación Europea de Cidades Históricas Termais ( EHTTA), o Día Europeo do Patrimonio Termal que este ano está centrado no “Urbanismo Termal”. O evento, organizado por Wiesbaden, estableceuno o Comité Científico da EHTTA en 2018 como unha celebración do patrimonio termal europeo e unha oportunidade para crear conciencia sobre o tema que está no corazón da Asociación e dos seus obxectivos.

O Día Europeo do Patrimonio Termal deste ano examinará o tema do “Urbanismo Termal” no contexto da “Paisaxe Terapéutica” e “a nosa cidade anfitrioa ( Wiesbaden) é un gran exemplo de que as cidades termais, coa súa paisaxe circundante, foron creadas para mellorar a saúde física e mental dos seus visitantes, involucrando aos habitantes e convidados nun proceso sostible que aínda gozamos hoxe, centos de anos despois”, explicou o presidente da Deputación de Ourense.

“Estes espazos son particularmente valiosos xa que as persoas buscan destinos saudables e espazos curativos despois da pandemia”, afirmou Manuel Baltar, quen explicou que “este é o primeiro dos tres eventos anuais que se celebrarán para analizar o desenvolvemento da Paisaxe Terapéutica”.

Dada a complexidade que conleva o tema das paisaxes terapéuticas decidiuse organizalo en tres series: a primeira centrada no Urbanismo Termal celebrada hoxe en Wiesbaden, no 2022 versará sobre parques e xardíns e no 2023 será sobre as cidades termais no seu conxunto. E, todo iso, tentando conectar cidades termais coa que se considera que é o modelo máis completo que hai no exterior que é Saratoga Springs que ademais é o balneario da capital do mundo que é Nova York. Por iso, cada ano vai comparar unha cidade de Europa cun dos aspectos de Saratoga. Este ano comparouse a praza de Wiesbaden, onde está o Kurhaus, coa praza central Saratoga State Park.

Este evento anual, deseñado para resaltar a importancia do patrimonio termal como unha tradición centenaria en toda Europa, “é considerado como un exemplo de boas prácticas polo Instituto Europeo de Roteiros Culturais, e gañou un premio en 2019 polo concepto”, lembrou Manuel Baltar.

O presidente da Deputación de Ourense interveu despois da benvida do alcalde de Wiesbaden, Oliver Franz, quen agradeceu a Baltar a súa visión e liderado á fronte desta entidade europea. Tras as intervencións de apertura da xornada, nas que participou Stefano Dominioni, secretario executivo do Instituto Europeo de Roteiros Culturais, celebrouse un panel de expertos no que interveu o vicepresidente do Comité Científico da EHTTA, Mario Crecente, que falou do urbanismo termal desde Saratoga Springs a Wiesbaden. A continuación, o secretario xeral dos Grandes Balnearios de Europa, Patrimonio da Humanidade pola UNESCO, Paul Simons, profundou no urbanismo termal nas grandes cidades de Europa, pechando o panel de expertos Thomas Weichel, da Oficina de Identidade-Compromiso-Participación cidadá da cidade de Wiesbaden, quen expuxo o tema do urbanismo termal en Wiesbaden. Ao acto tamén asistiu o membro do Parlamento Alemán, Klaus-Peter Willsch.

Ademais dos expertos, tamén estivo presente Emma González, en representación do Inorde, organismo dependente da Deputación de Ourense que asumirá a xerencia do Plan de Sustentabilidade “Ourense Provincia Termal” que contempla, entre as súas actuacións, a recuperación do patrimonio termal na nosa provincia como, por exemplo, as rehabilitacións na zona do Aquis Querquennis de Bande e o Balneario de Requeixo en Monterrei.

O Día Europeo do Patrimonio Termal pretende lograr “recoñecemento e conciencia sobre os problemas que afectan o futuro deste valioso patrimonio”, sinalou Baltar, quen engadiu que este evento “permítenos examinar en detalle como e por que nosas cidades desenvolvéronse, así como compartir ese coñecemento entre os nosos membros, lanzando luz sobre un aspecto importante do noso patrimonio compartido”, destacou Baltar.

Día Europeo do Patrimonio Termal

En 2018, celebrouse o primeiro Día do Patrimonio Termal Europeo no 100º aniversario da apertura do Hotel Gellert en Budapest, e foi un estudo de “Turismo termal e patrimonio de spa en Europa”. En 2019 en Spa, Bélxica, a atención centrouse na palabra “Spa” como un concepto que debe ser redefinido.

O ano pasado, o Día Europeo do Patrimonio Termal centrouse no tema da Arquitectura Termal e foi organizado por Baden- Baden en Alemaña, unha das “Grandes Cidades Balneario de Europa”, foi precisamente neste último cando se detectou que a arquitectura non era soamente a que definía ás cidades termais, senón máis ben os espazos públicos (o recreo, as paisaxes, a calidade do aire…) e todas as actividades que os doutores programan como pode ser camiñar, a gastronomía saudable, facer exercicio…, e é, precisamente, esa idea global a que fala das paisaxes terapéuticas.

A EHTTA considera que o patrimonio termal representa un fenómeno europeo moi particular, que inclúe recursos naturais, culturais e intanxibles. O concepto de patrimonio termal utilízase para promover a saúde e o benestar, para crear destinos turísticos orixinais e para protexer magníficas paisaxes culturais. Na Asociación, que preside Manuel Baltar, están representados 51 sitios termais de 18 nacións europeas, o que supón a organización pública máis importante do termalismo mundial.