Os socialistas constataron como un turismo de luxo desta marca alemá, permaneceu estacionado hoxe nun dos patios do Pazo Provincial e como empregados provinciais fixeron tarefas de limpeza
Pedirán “explicacións detalladas” sobre un feitos que definen como “preocupantes” e “graves” no caso de ser un vehículo privado e “aínda máis graves e preocupantes se é un automóbil público oculto”
O PSdeG-PSOE indagará e pedirá “explicacións detalladas” ao goberno de Manuel Baltar e aos seus socios –a tránsfuga Montse Lama e o partido de Jácome– na Deputación de Ourense, sobre a custodia e limpeza dun luxoso Porche Panamera valorado en 130.000 euros nas instalacións públicas da institución.
Os socialistas constataron como, durante a mañá de hoxe venres, un turismo de gran luxo desta marca alemá e de recente matriculación, permaneceu estacionado nun dos patios do Pazo Provincial, espazo onde habitualmente aparcan algúns dos vehículos oficiais afectados ao uso de autoridades e cargos electos. Ademais, durante o día de hoxe, empregados da Deputación tamén realizaron tarefas de limpeza exterior e interior deste automóbil.
No inventario que recolle o parque móbil provincial non figura ningún vehículo deste modelo e o goberno de Baltar, nos últimos meses, tampouco licitou concurso público algún para a súa adquisición.
A Deputación conta cun avultado parque móbil (en concreto máis dun cento de turismos e furgonetas, ademais doutros dous centos de vehículos pesados, maquinaria e técnicos) que, no caso dos vehículos destinados a autoridades e cargos electos, vén sendo utilizado de forma discrecional, sen que conste a existencia dun control que permita constatar un uso racional, eficiente e transparente, como xa denunciaron anteriormente os e as socialistas.
Por iso, desde o PSdeG-PSOE de Ourense pedirán “explicacións detalladas” sobre un feitos que definen como “preocupantes” e “graves” no caso de ser un vehículo de titularidade privada e “aínda máis graves e máis preocupantes se estamos ante un vehículo público que Baltar e os seus socios manteñen oculto”.