PP e Jácome néganse a cumprir os criterios do consello de contas para repartir democraticamente fondos da Deputación de Ourense

IES CHAMOSO LAMAS

“Non esperaba un ataque do PP ao Consello de Contas”, lamentou o líder socialista ante os “desprezos” e “medias verdades” por un “informe obxectivo” que “evidencia as súas vergonzas”, dixo Villarino

Os socialistas denuncian que PP, DO, BNG e tránsfuga Lama “prefiren manter a norma laboral unilateral de Rajoy fronte a nova lexislación do Goberno de Sánchez apoiada pola patronal e os sindicatos”

HIPER MASIDE

O Partido Popular, Jácome e a tránsfuga, Montse Lama, negáronse hoxe a cumprir os criterios estipulados polo Consello de Contas para repartir democraticamente os fondos públicos da Deputación de Ourense. Os conservadores e conservadoras non votaron a favor dunha iniciativa socialista que, na súa proposta de acordo, recollía, punto por punto, as conclusións que o máximo ente fiscalizador galego estampou nun informe que fiscaliza os criterios de distribución entre concellos no período 2003-2019.

O voceiro socialista, Rafa Villarino, asegurou que estamos ante un proceder que non é “nin equitativo nin democrático” segundo as conclusións deste “órgano independente” e detallou algunhas cifras comparativas coas outras institucións provinciais de Galicia. O peso porcentual das achegas da Deputación de Ourense para cooperación municipal foi do 6 % no 2018, fronte ao 48 % da Coruña, o 28 % de Pontevedra e o 27 % de Lugo. No referente ao importe total, a deputación ourensá dedicou só 4 millóns a estes plans, fronte aos 76 da Coruña, os 42 de Pontevedra e os 21 de Lugo.

“Non esperaba un ataque do PP ao Consello de Contas”, lamentou o líder socialista ante os “desprezos” e “medias verdades” por un “informe obxectivo” que “evidencia as súas vergonzas”. “Estamos ante unha xestión ineficaz e ineficiente”, insistiu antes de denunciar que “centos de millóns de euros se foron polo sumidoiro” por culpa deste “reparto a dedo” do goberno de Baltar, DO e a tránsfuga Lama. “Vostedes están en contra dos ditames e recomendacións de Contas”, aseverou Villarino tras recordar á corporación que os puntos de acordo son “precisamente” as conclusións do ente fiscalizador.

“Todo o que se fai nesta deputación é clientelar, sen ter en contar a equidade, a coordinación ou a perspectiva de xénero, tal e como indica Contas”, advertiu o portavoz do PSOE antes de denunciar que o PP e os seus socios “xa perderon o pudor e por iso non lles importa votar en contra”. “A palabra democracia cáusalles sarpullidos”, concluíu.

A pesar de que Contas advirte, entre outras conclusións, que os criterios non son “obxectivos e equitativos” e que a distribución destes cartos de “forma discrecional” pasou de representar o 30 % en 2006 ao 76 % durante de 2016, PP, DO e a tránsfuga optaron por ignorar vergoñentamente un informe que evidencia un reparto “inxusto, insolidario e falto de toda transparencia” que “non cumpre cos criterios básicos dunha democracia”, insistiron desde o PSdeG.

A moción demandaba, unha vez máis, un plan que integre todas as axudas e unha regulación técnica para estes instrumentos. Tamén incluír neles todas as actuacións que respondan a este obxecto, usando convenios “a dedo” de forma excepcional e xustificando a súa elección. Igualmente esixía unha análise do custo dos servizos municipais nos criterios de reparto entre os concellos, puntos que deberían ter en conta a poboación; o número de núcleos habitados; a superficie ou o envellecemento dos empadroados, entre outros.

“O BNG prefire a normativa laboral unilateral de Rajoy”

O PSdeG-PSOE denuncia que o BNG sumouse hoxe aos conservadores da Deputación de Ourense, para non defender a aprobación da nova normativa laboral moderna e acordada, por primeira vez na historia, cos representantes sindicais, empresariais e do Goberno central. “É incomprensible que un partido progresista prefira manter a normativa regresiva aprobada a dedo e sen acordo polo goberno de Mariano Rajoy, antes que esta nova lexislación que nos sitúa á vangarda dos dereitos sociais e laborais de Europa”, proclaman desde o grupo provincial socialista.

Diego Fernández asegurou que “aínda que todos os actores seguro que tiñan outras pretensións iniciais”, o resultado que está en trámite no Congreso é “froito do diálogo” e do “acordo” para “avanzar”. O deputado socialista detallou que esta reforma servirá para “impulsar” a economía e a demografía de Ourense porque, entre outras razóns, “quita unha lousa de inxustiza sobre a mocidade da nosa provincia” que impuxo o texto de Rajoy. “Trátase dun éxito de país”, insistiu antes de salientar a importancia de avanzar na senda marcada por esta normativa “para cambiar o actual modelo produtivo” e de instar ao presidente Baltar a “falar coa CEO que tamén abandeira esta reforma”.

Durante a sesión o deputado reclamou o referendo unánime para “a creación de emprego estable e de calidade” e para “atallar a precariedade e o desemprego”, co fin de “impulsar o crecemento actual”. “Dicir non a esta lexislación laboral é dicir non ao progreso das nosas empresas e de todas as persoas”, aseguran os e as socialistas.

“Con esta reforma avanzamos en dereitos laborais e melloras salariais, pero non devaluamos as nóminas dos traballadores e traballadoras, como fixo o PP hai unha década”, insisten antes de destacar a “exemplaridade do acordo unánime acadado agora por todos os axentes sociais e non as contrarreformas de antes”. Desde o PSdeG-PSOE da Deputación de Ourense insisten en reclamar a todas as forzas políticas da provincia que “apoien este novo marco normativo pois, de non facelo, quedaremos co que tiñamos aprobado sen acordo por Rajoy no ano 2012 e as súas lamentables consecuencias”.