A Xunta felicita ao Concello de Boborás por sumarse e implicarse na nova cultura do fermosismo pola que aposta o Goberno galego, así como pola humanización e mellorar dos espazos públicos.
Así llo agradeceu a conselleira de Medio Ambiente, Territorio e Vivenda, Ángeles Vázquez, á alcaldesa, Patricia Torres, coa que mantivo unha reunión para coñecer as demandas deste concello da provincia de Ourense.
Vázquez Mejuto recordou que na primeira convocatoria de axudas para evitar impactos paisaxísticos, a de 2021, Boborás recibiu unha axuda de case 10.000 euros para levar a cabo unha mellora e intervención do lavadoiro do Curro, en Feás.
“Sen dúbida, Boborás é un municipio referente do compromiso co fermosismo, non só desde as instancias municipais, senón tamén por parte da veciñanza”, salientou a representante autonómica, en relación a que en 2021 tamén se apoiaron oito actuacións de particulares cunha subvención total do Goberno galego de 18.664 euros para mellorar os inmobles, co revestimento e pintado de fachadas, así como co remate de cubertas.
A conselleira indicoulle á rexedora que na actualidade o Instituto de Estudos do Territorio está a analizar as solicitudes recibidas ao abeiro da segunda convocatoria.
Asemade, a alcaldesa trasladoulle á conselleira os seus parabéns pola liña de incentivos dirixida aos concellos, que convoca e xestiona Medio Ambiente, para a adquisición de puntos limpos móbiles, da que Boborás se beneficiou. Patricia Torres indicoulle que, grazas a unha axuda de máis de 50.000 euros, o municipio dispón agora deste novo equipamento co que ofrecer un servizo aos veciños máis cómodo e accesible para eles, que facilita o depósito, separación e reciclaxe dos residuos.
Nese sentido, Vázquez Mejuto felicitou á alcaldesa por implicarse e apostar por medidas e proxectos que son respectuosos coa contorna e, sobre todo, que fan avanzar a Galicia na senda da economía circular, coa que espremer os refugallos urbanos e aproveitar a totalidade do seu ciclo vital, como novas materia primas.