O bono turístico #QuedamosEnGalicia22 non só repetiu senón que superou o éxito do ano pasado duplicando o número de solicitudes en canto se abriu a plataforma habilitada para a reserva. De feito, se nas primeiras 12 horas da edición de 2021 houbo unhas 10.000 solicitudes, este ano xa superou as 20.000, polo que xa hai unha importante lista de espera.
O prazo de presentación da solicitude do bono turístico, unha iniciativa destinada a fomentar o turismo interno e axustar estacionalmente a oferta turística en Galicia, abriuse ás 00:00 horas do 21 de marzo e rematará o 2 de maio de 2022. Xa de madrugada o número de peticións foi tal que en menos de 12 horas rexistráronse 20.000 peticións, o dobre que na convocatoria do ano pasado.
Ante a previsión de alta demanda, reforzouse o sistema e habilitouse o acceso específico e independente na sede electrónica da Xunta só para os solicitantes do bono. Aínda así, debido ao éxito da convocatoria podería rexistrarse algunha incidencia concreta con colas rexistradas. O propio sistema estableceu unha lista de espera que permite ao usuario manter a súa quenda e acceder un pouco máis tarde á web.
O vicepresidente primeiro da Xunta amosou a súa satisfacción polo éxito deste novo evento “que ofrece aos galegos a posibilidade de coñecer Galicia”. Alfonso Rueda destacou que a alta acollida do bono é unha proba máis de que “Galicia está de moda” e de que a comunidade galega “é un refuxio en tempos de incerteza”.
O bono turístico consistirá nunha tarxeta de prepago para o seu uso en establecementos e empresas adheridas ao programa e que están publicadas na páxina web da Axencia de Turismo de Galicia https://www.turismo.gal/quedamosengalicia22.
Nesta edición, a Xunta asumirá o 40% do custo dos servizos consumidos e os particulares o 60% restante en función da cantidade escollida. Como o ano pasado, haberá tres tipos de vales: un de 250 € -100 € pagados pola Xunta e 150 € polos beneficiarios-; outro de 375 € -150 € aportados polo Goberno galego e 225 € por particulares-; e a terceira de 500 euros -200 € para a Xunta e 300 para os usuarios-. Cómpre lembrar que o ano pasado a tarxeta de maior contía foi escollida pola gran maioría dos solicitantes.
A anterior edición da bonificación foi unha medida pioneira que permitiu inxectar 7,6 millóns de euros no sector, sobre todo nos meses de menor actividade e concentrando o consumo no último trimestre do ano.
Beneficiarios
Poderán ser beneficiarios deste Bono Turístico as persoas físicas maiores de idade, que estean empadroadas nalgún concello da Comunidade Autónoma de Galicia. Cada persoa física só poderá solicitar e ser adxudicataria dun Bono Turístico e as persoas que xa foran beneficiarias o ano pasado non poderán solicitar nin ser beneficiarias desta nova edición do Bono Turístico.
As persoas interesadas que desexen optar ao Bono Turístico deberán presentar a súa solicitude, obrigatoriamente por medios electrónicos a través da sede electrónica da Xunta de Galicia, a través do formulario normalizado dispoñible na sede electrónica da Xunta de Galicia https://sede .xunta. .gal
