Sería un novo golpe ao futuro do Carballiño coa perda doutro servizo polo que levaremos unha iniciativa ao vindeiro pleno para recabar o apoio de tódolos grupos da corporación.
Hai que impedir a toda costa este primeiro paso que conducirá irremediablemente ao peche total do centro.
Nos vindeiros días convocaremos unha reunión con tódolos afectados para procurar solucións que eviten esta nova aldraxe.
A Consellería de Educación da Xunta de Galicia ven de confirmar aos membros da comunidade educativa do CEIP Calvo Sotelo a súa intención de pechar xa dende o vindeiro curso a aula de nenos de 3 anos do centro do Campo da Feira.
É esta unha inaceptable nova que resta unha opción de escolarización, agora e no futuro, para moitas familias nunha zona densamente poboada.
Non hai máis que ollar o acontecido noutros lugares semellantes para ter a certeza de que este é só o primeiro paso para o peche total dese centro. Se este ano se suprimen a clase de 3 anos, para o ano xa non haberá a de 4 e así sucesivamente ata a desaparición total. Se se consinte o peche, xa non voltará a abrir.
Esta nova é outro cravo no ataúde do futuro da nosa vila que, día a día, perde servizos, perde atractivo e perde poboación a pasos axigantados.
No derradeiro pleno falouse claramente dunha perda de case 200 habitantes nun só ano e o que é aínda peor, un preocupante envellecemento da poboación.
Todo elo a causa dunha ausencia total de políticas para atraer a poboación nova e do fomento da natalidade por parte do Concello nos últimos anos.
Nin servizos de conciliación, nin infraestruturas deportivas, nin novas zonas de xogo infantís… A lista é interminable pero agora o que toca é revertir esta dinámica e freala dende xa con accións concretas que impidan o peche desa aula que de permitirse será a primeira de moitas.
Dende Espazo Común, aparte de traballar ata o derradeiro pulo para evitar que se leve a termo esta decisión, traballaremos na posta en marcha de programas que fagan de novo do Carballiño unha vila atractiva e que fixe poboación xoven para garantir un futuro para os que veñen detrás.
No canto de defender a nosa posición como primeira vila da provincia, semella que haxa unha resignación incomprensible e unha nula perspectiva de proxecto de pobo.
Entre outras accións, convocaremos nos vindeiros días a tódolos afectados (profesores, pais, persoal para tomar decisións sobre como afrontar e revertir esta situación e levaremos unha moción ao vindeiro pleno para que tódolos grupos da corporación apoien as iniciativas encamiñadas a elo.
