Afundación, Xunta de Galicia e Editorial Planeta presentan en Ourense «O Camiño ilustrado. Unha viaxe pintada por Alicia Aradilla»

I Inaugurarase mañá, mércores 11 de maio, ás 10.30 h na Sala de Exposicións Afundación de Ourense

I Este proxecto expositivo da Obra Social de ABANCA ten como obxectivos difundir o coñecemento do patrimonio natural e cultural ao tempo que se promove o seu coidado, con arranxo ao cumprimento dos Obxectivos de Desenvolvemento Sostible

AVANTAR ACTIVIDADES

Afundación, a Obra Social de ABANCA, a Xunta de Galicia e Editorial Planeta presentan mañá na Sala de Exposicións Afundación de Ourense, ás 10.30 h, a rolda de prensa de inauguración da nova mostra que acollerá a sala expositiva ourensá ata o vindeiro 10 de xullo, «O Camiño ilustrado. Unha viaxe pintada por Alicia Aradilla». A este acto inaugural acudirán Paloma Vela Garicano, coordinadora adxunta da Área de Cultura Afundación; Cecilia Pereira, comisaria do Xacobeo 21-22; e Rubén Saavedra, director territorial de ABANCA en Ourense.

«O Camiño ilustrado. Unha viaxe pintada por Alicia Aradilla» recolle as 60 acuarelas realizadas pola recoñecida ilustradora e autora de cadernos de viaxe que conta con máis de 125 000 seguidores en Instagram. Articulada en tres seccións fundamentais ―«O Camiño», «Os camiñantes» e «Compostela. A cidade e o seu patrón»―, e con textos explicativos do doutor en Historia Feliciano Novoa, a mostra permanecerá aberta a partir de mañá en horario de luns a venres de 17.30 a 20.30 h e sábados, domingos e festivos, de 12.00 a 14.00 h e de 17.30 a 20.30 h.