“Actuando nas marxes” é o lema que guiará o discurso e a liña de coherencia da MIT deste ano, que terá lugar do 15 ao 24 de xullo.
Territorios nas marxes, eses espazos artísticos, sociais, xeográficos e políticos que nos estimulan, que nos cuestionan, que nos convidan a ver a complexidade da realidade sen caer en discursos simplistas. Aquí queremos asentar a liña conceptual desta MIT 2022. O marxinal, o marxinalizado, a marxinación, a marxinalidade… Os límites e o prohibido, o tabú, o esquecido, aquilo que moitas veces se oculta, o que non podemos definir, o que nos provoca incertidume, o que nos fai rir de xeito incómodo, o que nos convida a revisitarnos na nosa vida de enxuizamento e polarización constante. É un tema estimulante, un concepto aberto, na liña da creación contemporánea e do seu carácter liminal, como quere ser este festival que sempre aposta por descubir e explorar novas fronteiras e o modo de cuestionalas.
Ese será o núcleo de coherencia e aposta do festival para esta edición de 2022, cuxa programación se dará a coñecer no mes de xuño con todo o detalle de horarios de espectáculos, coproducións e actividades paralelas.
O deseño, de A&B, gabinete creativo de Ribadavia que xa forma parte do equipo habitual de traballadoras da MIT, combina formas xeométricas e coloridas con fotografía dos corpos en escena de edicións anteriores, corpos fotografiados por Rosiña Rojo. O cartel inspírase na corrente artística do Grupo Memphis, que xurdiu en Italia nos anos oitenta para revolucionar o concepto de deseño e arquitectura. O carácter vibrante das formas e o colorido enlaza coa idea festiva e celebrativa que quere expresar o festival, un festival de encontros, provocador desas formas e imaxes excéntricas, é dicir, fóra dos centros e na forza das marxes.
