O vicepresidente segundo da Xunta e conselleiro de Presidencia, Xustiza e Deportes, Diego Calvo, e o conselleiro do Medio Rural, José González, e o delegado do Goberno en Galicia, José Miñones, presidiron a reunión do Comité Integrado de Prevención de Incendios de Galicia (CIPIG) para este ano 2022.
Este comité ten como obxectivo coordinar as actuacións da Xunta e do Goberno central en materia de prevención e loita contra os incendios forestais na comunidade galega.
Este ano creouse un Sistema de Mando Operativo Estrutural para mellorar a seguridade e a eficiencia na extinción de incendios forestais, que permitirá que o director técnico de extinción de cada lume se libere de tarefas secundarias, reforzando o seu papel na coordinación do dispositivo. A rede fixa de vixilancia na montaña sumará seis novas cámaras con tecnoloxía punta, chegando ás 148 en 74 localidades e cubrindo case o 70% do territorio.
A Xunta mobilizará a máis de 7.000 efectivos na loita contra o lume, 380 motobombas entre outros medios terrestres e unha trintena de medios aéreos. Entre os efectivos mobilizados, a Policía Autonómica destinará 232 axentes á investigación de incendios forestais e 115 vehículos.
Ambos apelaron á colaboración cidadá para extremar as precaucións no monte e colaborar na denuncia de actitudes sospeitosas. Así, está activo o teléfono anónimo e gratuíto para denunciar incendiarios, 900 815 085, e o servizo gratuíto 085, ao que se debería chamar en caso de detectar un incendio forestal.
