A seca só explica parte dos problemas de abastecemento de auga que padecemos en Ribadavia, a situación non acadaría a gravidade actual se desde o goberno municipal se aplicaran a tempo as medidas que se aconsellaban, como demostran os informes aos que finalmente puido acceder o grupo municipal do BNG.
Dous informes de “Estado nivel captación río Maquiáns” de 13 de xuño e 11 de xullo presentados pola empresa adxudicataria do servizo municipal de abastecemento de augas alertaban dos problemas de seca e facían as seguintes recomendacións:
- A optimización do consumo das instalacións municipais (cun listado de consumos das mesmas que polo de agora non coñecemos)
- Cancelación de limpeza de vehículos, rego e baldeos
- Prohibición do consumo para uso agrícola
- Peche de fontes ornamentais
Malia a reiteración das medidas aconselladas en ambos informes e que no oficio do 11 de xullo se cualificaba a situación como crítica, o primeiro bando sobre o asunto publicouse o 22 de xullo e ate que a situación na captación do río Maquiáns, se fixo desesperada a comezos de agosto, non se aplicaron a maior parte das medidas recomendadas.
