Esta mañá, nas instalacións do ApartaHotel Arenteiro, compareceu o a organización dos Galardóns Arenteira, para dar conta do fallo do xurado nesta 11ª edición. A entrega destes premios terá lugar o vindeiro día 25 de novembro, no Auditorio Manuel María do Carballiño, ás 20:30 horas.
O responsable do ApartHotel, Uriel Bernárdez, agradecía a colaboración do concello do Carballiño por ceder o espazo do auditorio para celebración do acto de entrega destes premios.
O presidente do xurado, Xosé Luis Sobrado, daba a coñecer os galardoados nesta 11ª edición. Na modalidade de Cultura e Investigación, don Eduardo Bernárdez. Na modalidade de Deportes, o premiado é o Club Baloncesto Maside.
A título póstumo, a Arenteira premia a María Teresa Miras Portugal, persoa nacida e estreitamente vinculada co Carballiño, foi, ademais, a primeira galardoada coa Arenteira no apartado de Cultura e Investigación.
Este ano, a organización creou un novo apartado, baixo o título “Superación Escolar”, un premio que busca integrar ós mozos e facelos partícipes deste galardón como parte importante da sociedade. Neste caso recae sobre Jennifer Manzano Montoya (14 anos).
O membro do xurado e con marcada traxectoria no eido da docencia, Manuel Amil, destacou a relevancia deste último premio, incorporado este ano, e para o que se conta en exclusiva co voto dos centros educativos do Carballiño e do Ribeiro que ofertan ESO e Bacharelato.
