O BNG de San Cibrao das Viñas reclama melloras na seguridade vial na estrada que comunica Castro Verde e Ponte Noalla e faino denunciando que nesta estrada, e tal e como afirma o candidato á alcaldía pola formación nacionalista Artai Gavilanes, “nun treito aproximado dun quilómetro, hai xa demasiado tempo que se colocaron uns parafusos, nos que deberan suxeitarse as lámpadas que deberan iluminar esa estrada, pero desafortunadamente nunca se rematou o proxecto e ditas luminarias quedaron sen instalar, o que supón un risco evidente para as transeúntes”.
Ante esta situación, desde o BNG de San Cibrao solicitan que á maior brevidade posible, “sexa aprobado un proxecto definitivo que permita a colocación das luminarias na estrada de Castro Verde a Ponte Noalla para garantir a seguridade viaria e evitar que se produza algún incidente non desexado entre os viandantes desa estrada”.
Finalmente, e segundo Gavilanes, “cómpre que de xeito transitorio e mentres non se desenvolve o proxecto, a zonas nas que se ubican as anclaxes das lámpadas, estean perfectamente sinalizadas para evitarmos calquera tipo de incidente”.
