«Cultura por alimentos», o programa solidario de innovación social de Afundación, recadou máis de dez toneladas de produtos para os Bancos de Alimentos
Grazas á colaboración subscrita con FESBAL, todas as persoas que participan nas actividades da Obra Social de ABANCA poden depositar as súas doazóns nos colectores destinados a este fin
I «Cultura por alimentos» é transversal a todas as actividades culturais de Afundación, invitando a doar alimentos a cambio da participación da oferta cultural da entidade
«Cultura por alimentos» é un programa solidario, con vocación de continuidade, enmarcado na estratexia de innovación social, que Afundación, a Obra Social de ABANCA implementou no ano 2021 en resposta ao chamamento dos bancos de alimentos. Por mor do acordo subscrito daquela con FESBAL (Federación Española de Bancos de Alimentos), Afundación habilitou contedores en todos os seus edificios, á vez que promovía a doazón de produtos non perecedoiros a todas as persoas participantes e usuarias das súas actividades. Outra modalidade de «Cultura por alimentos» consiste en cambiar a entrada a un evento determinado pola doazón en alimentos como foi o caso do ciclo de música Butaca de Jazz ou o concerto familiar Con Fusión, da Compañía Píscore, programado co gallo do Día da Infancia, convidando a doar alimentos infantís. Ata a data, conseguíronse recadar máis de dez toneladas de produtos non perecedoiros.
PUBLICIDADE ELECTORAL
As imaxes e o material audiovisual están dispoñibles aquí:
En palabras de Concepción Rey Pereira, presidenta do Banco de Alimentos Rías Altas, «para os bancos de alimentos de Galicia esta iniciativa de Afundación é unha verdadeira marabilla. Ademais da recadación, por suposto, este programa dá visibilidade ás necesidades e aos chamamentos que realizamos. Así, tanto empresas como persoas individuais están a solidarizarse coa nosa demanda, e conseguimos poder botar unha gran man alí onde é necesario».
María Teresa Cores, coordinadora del Área de Cultura de Afundación, remarcou que «sendo conscientes da situación de moitas familias no contexto actual de crise, Afundación desenvolve un proxecto mediante o que poñemos á disposición da sociedade a rede de edificios e sedes culturais para colaborar co Banco de Alimentos. Así, a función social da cultura faise máis visible con proxectos coma este, que continuará en 2023, conscientes da importancia da solidariedade para avanzar en conxunto como sociedade».
A grande acollida deste programa, que continuará en 2023 con novas actividades, permitiu que as colleitas transcendan as infraestruturas de Afundación e se promova a entrega solidaria en lugares nos que a Obra Social de ABANCA colabora en iniciativas culturais con outras entidades, como nas exposicións que programa Afundación en distintas localidades alén das súas sedes a través de salas de exposicións municipais, dentro do proxecto «Corrente cultural».
Así mesmo, Afundación programou durante 2022 algunhas actividades deseñadas expresamente para servir ao programa «Cultura por alimentos», entre elas destacan a exposición «This is pop. Das latas de Andy Warhol ás túas» e especialmente «CONSERVA. Unha instalación de Jorge Perianes para “Cultura por alimentos”», coa que o artista galego reflexionaba, a través dunha espectacular instalación deseñada ad hoc, sobre o traballo nas conserveiras galegas, á vez que se convidaba aos asistentes para doar latas de conservas para o programa social. Unha actividade innovadora e social que contou coa colaboración de ANFACO, que sumou unha importante doazón de alimentos ao programa. Na actualidade, enmárcanse tamén neste programa o ciclo de cinema da Coruña centrado na intelixencia artificial e todas as exposicións desenvolvidas por Afundación.
Grazas a todas estas iniciativas e á solidariedade da cidadanía galega, desde o mes de setembro de 2021 ata a data, recadáronse máis de 10 toneladas de produtos non perecedoiros que se entregaron a FESBAL.
Utilizamos cookies para asegurar que damos a mellor experiencia ao usuario no noso sitio web. Se continúa utilizando este sitio asumiremos que está de acordo.Estou de acordoAviso legal e Privacidade
