“O pendello do PP só logrou sumar en 2022 uns 400.000 viaxeiros e viaxeiras, case tres veces menos que a estación de ferrocarril situada ao seu lado, que a conselleira criticou”, denuncian desde o PSOE
“O fracaso é culpa das decisións erróneas” da Xunta con Ourense, á que “castigan con proxectos de escasa calidade e investimento”, advirten tras destapar a “trampa ao solitario” de Vázquez coas cifras
Ourense, 15 de febreiro de 2023. O PSdeG-PSOE denuncia o “estrepitoso fracaso” da Xunta coa mobilidade de Ourense, logo de que a conselleira de Infraestruturas e Mobilidade, Ethel Vázquez, viñera onte á terceira cidade de Galicia a presumir do “vergoñento pendello” que construíu como estación de autobuses. “O pendello do PP só logrou sumar en 2022 uns 400.000 viaxeiros e viaxeiras, case tres veces menos que a estación de ferrocarril ourensá situada ao seu lado, que a conselleira criticou, a pesar de ter moitos menos servizos e destinos que a terminal de autobuses”, denuncian.
Os e as socialistas destapan a “trampa ao solitario” de Vázquez Mourelle, quen tivo que sumar dous exercicios e incluso comparar as cifras de 2022 coas de 2021, un ano aínda con problemas de mobilidade a causa da pandemia da Covid-19, para “maquillar as cifras totais e a porcentaxe de crecemento de usuarios e usuarias do seu pendello”.
Desde o PSOE recordan que o “naufraxio da Xunta” coa estación de autobuses ourensá é “tan evidente”, que as cifras de viaxeiros e viaxeiras que empregan outras paradas de autobuses interurbanos dentro do municipio ourensán -máis de medio millón- supera con creces a de persoas que empregan a terminal da Xunta. “A veciñanza evita usar o pendello da Xunta porque está mal deseñado e peor executado, ademais de ser un atentado contra o urbanismo sostible e a estética urbanística”, denuncian antes de resaltar que “as queixas das persoas que por alí pasan son recorrentes”.
“O fracaso da terminal de autobuses ourensá é culpa das decisións erróneas e das deficientes políticas de mobilidade da consellería Vázquez con Ourense”, cidade á que “castiga recorrentemente con proxectos de escasa calidade técnica e investimentos minúsculos”. Por iso, desde o PSdeG-PSOE ourensán reclaman un “cambio radical” da conselleira coa terceira urbe galega, que pasa por “sentarse a falar coa sociedade ourensá” para “poñer fin ás súas equivocadas decisións unilaterais”.
Así mesmo, os e as socialistas tamén se comprometen a “traballar arreo desde os próximos gobernos socialistas da cidade de Ourense e da Xunta de Galicia, para arranxar a desfeita executada no barrio da Ponte”, impulsando unha “terminal de autobuses digna” que non “afogue un centro de saúde” e que “rexeite tan evidentemente a cidadanía”.
Cambio nas políticas de mobilidade
Desde o PSdeG-PSOE tamén claman por un “cambio global” das políticas de Xunta. “Moitas persoas non poden acceder ao transporte público polas escasas e mal artelladas rutas autonómicas, as longas agardas e as infraestruturas inadecuadas”, denuncian antes de recordar que “moitas zonas rurais e periurbanas carecen de servizos”, o que xera unha “fonda brecha social”. “O fracaso de Ethel Vázquez en Ourense é tan maiúsculo que incluso os empresarios e empresarias do cinto industrial de Ourense, de San Cibrao e Pereiro critican os escasos servizos prestados pola Xunta para atender a maior área empresarial de Galicia”, recordan.
No PSOE consideran que a Xunta debe cambiar estas políticas de mobilidade centradas só no autobús, porque non están a atender as necesidades reais da veciñanza”. “Poñer o foco só no autobús non é suficiente para responder a retos como a conxestión do tráfico, a contaminación ou a eficiencia enerxética”, matizan antes de reclamar “un enfoque máis integral que inclúa alternativas como o tren de titularidade autonómica ou a bicicleta”, para que Galicia “estea en consonancia cos obxectivos globais de desenvolvemento sostible”.