- O proxecto de creación dunha aula de formación en ecografía clínica para residentes e médicos de familia no ámbito rural mereceu o primeiro premio da II Bolsa de Medicina Rural ASOMEGA-SEMG
- O seu promotor Keith Albert Foo é precisamente un dos facultativos que se beneficiou da convocatoria do Sergas para cubrir prazas de dificil cobertura
- Grazas a esta proposta Laza será punto central da formación dos profesionais da provincia en ecografía clínica aplicada á Atención Primaria
Ourense, 27 de xaneiro de 2023. O delegado da Xunta de Galicia, Gabriel Alén, acompañado de Félix Rubial, xerente da Área Sanitaria de Ourense, Verín e Valdeorras, achegouse ao Centro de Saúde de Laza para coñecer, de primeira man, o proxecto de creación dunha aula de formación en ecografía clínica para residentes e médicos de familia no ámbito rural, que ven de gañar un premio nacional.
Esta innovadora iniciativa foi promovida polo novo médico titular de Laza, Keith Albert Foo, precisamente un dos vinteun facultativos da provincia que ven de acceder a unha praza en propiedade, mediante a recente convocatoria do Sergas vía concurso de méritos, sen exame, para promover e facilitar a estabilidade do persoal nos centros de saúde, e moi especialmente naqueles de areas rurais e de dificil cobertura.
De orixe galega-venezolana, o novo médico de Laza é un apaixonado da docencia, núcleo central da proposta formativa que obtivo o primeiro premio da II Bolsa de Medicina rural da Asociación de Médicos Galegos (Asomega) e da Sociedade Española de Médicos Xerais e de Familia (SEMG), nunha edición marcada polo alto número e calidade dos proxectos presentados, que se saldou cun primeiro premio e dous accesit.
Aumentar a capacidade diagnostica da Atención Primaria
Entre os obxectivos do proxecto destaca o de integrar a técnica ecográfica como unha ferramenta diagnóstica habitual na actividade asistencial na contorna rural, sacando así o máximo partido da dispoñibilidade destes equipos na rede asistencial básica do Servizo Galego de Saude, que ven de renovar estes equipos no marco do plan de mellora, e están dispoñibles en todos os Servizos de Atención Primaria de Ourense, na cidade e nas cabeceiras de comarca..
A creación da aula permitirá contar cun programa formativo, axeitado ás necesidades dos médicos de familia, para aumentar a súa capacidade resolutiva e diagnóstica, máis importante ainda ao ter en conta a xeografía da provincia de Ourense, con multitude de pequenos centros de saúde afastados da cidade e do hospital de referencia.
Ademáis, a aula permitirá fortalecer os lazos entre os profesionais e compartir experiencias, establecendo un sistema de titorización e formación en ecografía clínica con interacción con referentes, como os cotitulares do proxecto, Manuel Solla e Manuel Devesa, médicos do Centro de Saúde de Allariz.
O devandito é outro dos eixos deste plan docente, que constará de seis semanas presenciais no centro de saúde nas que existirá unha etapa formativa, outra práctica e outra de avaliación. “Un proxecto que aposta polo futuro da profesión” segundo remarcou o xurado do premio.
A dotación da bolsa é de 4.000 euros o que permitirá a Albert instaurar unha fase piloto do proxecto, poñendo a punto a aula no centro de saúde para recibir aos residentes ou profesionais que acudan a Laza a formarse. Iniciativa que conta co apoio activo da Área Sanitaria de Ourense, Verín e Valdeorras que lle facilita a parte máis custosa: o ecógrafo e os materiais precisos.
Hai que subliñar que, nesta segunda edición, novamente un proxecto ourensán faise coa bolsa de medicina rural Asomega-SEMG, que se iniciou o pasado ano elixindo a proposta das xornadas sociosanitarias promovidas polo Servizo de Atención Primaria de A Limia, dirixidas pola entón pola xefa de servizo de Xinzo, Cristina Margusino.
