Luís Fernández Gudiña encabezará a candidatura do Psdeg á alcaldía da Rúa co obxectivo de “abrir” o concello á veciñanza e defender os seus intereses

II EDICIÓN COCHES CLÁSICOS NO IRIXO

Explica que se presenta ás eleccións porque “vimos observando ao longo desta lexislatura que existe un gran descontento no municipio pola forma de xestionar que ten o actual equipo de goberno”

“Defenderemos a sanidade e a educación públicas e poremos en marcha un plan de vivenda social para que aqueles que o precisen poidan vivir nestas vivendas”, sinala o candidato socialista

XUNTANZA DE CLÁSICOS NO IRIXO

A Rúa, 8 de marzo de 2023. O PSdeG-PSOE aposta novamente por Luís Fernández Gudiña como candidato á alcaldía da Rúa nas eleccións municipais que se celebrarán o vindeiro 28 de maio. O candidato socialista preséntase ós comicios electorais co obxectivo de “abrir” o concello á veciñanza e de que dende o goberno municipal “exista unha preocupación polos veciños e polas veciñas e se este sempre pendente deles e delas”.

O candidato socialista conta co bagaxe de que xa foi alcalde do municipio entre 2017 e 2019 e busca revalidar á alcaldía. Explica que se presenta a estas eleccións locais porque “vimos observando ao longo desta lexislatura que existe un gran descontento no municipio pola forma de xestionar que ten o actual equipo de goberno”. Engade que “fixeron do concello un lugar onde a xente non ten posibilidade de achegarse e poder presentar os seus problemas para atopar solucións”, xa que segundo apunta “ninguén os atende e escoita”.

Fernández Gudiña sinala que existen “fondas preocupacións” pola calidade dos servizos, xa que tal e como explica “veñen deteriorándose dunha maneira palpable nos últimos tempos”. Neste senso afirma que “non se están cubrindo as prazas vacantes que se producen por xubilación, o cal leva a que instalacións como a biblioteca ou o centro cultural estean a sufrir un notorio deterioro, ante a falta de recursos e persoas para poder atender estes servizos correctamente”.

“Defenderemos a sanidade e a educación públicas e poremos en marcha un plan de vivenda social para que aqueles que o precisen poidan vivir nestas vivendas”, sinala o candidato do PSdeG-PSOE en A Rúa. Tamén destaca que no caso de gobernar “apostaremos pola humanización dos núcleos de poboación que temos, para que os veciños e veciñas poidan ter unhas infraestruturas acordes aos tempos que corren”.

Por último, Luís Fernández Gudiña, destaca que o PSOE “é o partido municipalista por excelencia, xa que o levamos no ADN”. Neste senso tamén afirma que “o que nos move a presentarnos é a xente e o único interese que temos e traballar por e para a veciñanza”.