Nove IES da provincia acollerán nos próximos días unhas xornadas sobre a UNED, dirixidas ao alumnado de bacharelato. O director da UNED Ourense, Jesús Manuel García Díaz, retoma as visitas a estes centros, nesta ocasión a nove institutos situados en Celanova, O Carballiño. Maceda, Ribadavia, Verín e Xinzo de Limia.
A primeira destas charlas de orientación terá lugar na capital limeña, o martes 21 de marzo, ás 08:30 horas no IES Lagoa de Antela. A segunda terá lugar no IES Cidade de Antioquia, tamén en Xinzo.
O venres, día 24, a UNED acudirá a Verín, onde o seu director dirixirase ao alumnado do IES García Barbón, ás 09:10 horas. e ao mediodía fará o propio no IES Taboada Chivite.
As seguintes xornadas estarán dirixidas a mozos que están a piques de ir á universidade e que se preparan para ela no Carballiño. Están programadas dúas intervencións, a primeira no IES Chamoso Lamas, a partir das 10:20 horas, e a segunda, no IES no 1.
Celanova tamén acollerá esta charla para coñecer como estudar na UNED, e a súa oferta de graos, másteres, micrograos e doutoramentos. Será o 12 de abril, ás 13:00 horas no IES Celso Emilio Ferreiro.
No IES Serra de San Mamede de Maceda haberá outra charla o 28 de marzo, ás 13:20 horas. E no IES O Ribeiro de Ribadavia, outro na mañá do venres 31.
A UNED Ourense xa visitou os institutos da Rúa, O Barco, Trives e Viana. Nesta ocasión continúa polo resto do territorio provincial, centrándose na zona sur e oeste.
A UNED permite cursar 30 graos sen nota de corte. Tamén ofrece titulacións combinadas, é dicir, permite obter dúas titulacións en áreas de coñecemento afíns cursando menos de 360 ECTS. Os mestrados universitarios contan con máis de 75 en cinco áreas de coñecemento. Tamén conta con micrograos, que son títulos universitarios que se poden cursar nun ano. Os créditos ECTS, unha vez aprobados, poderán incorporarse ao correspondente expediente de grao ou máster.
A UNED ofrece 21 programas de doutoramento e xa son varios os ourensáns que están inmersos neles.
