“Se coas luces o argumento era o de que non teñen cartos pero queren contratalas igual, agora, ademais de non ter cartos para festas, nin se quera explica en que vai gastar o diñeiro”, afirmou a edil María FernándezOjea
“Ao mellor a veciñanza pensa que o que imos pagar con esta partida son festas como os magostos ou incluso o entroido, que xa pasou, pero esas celebracións teñen a súa propia partida orzamentaria de medio millón de euros”, puntualizou
Ourense, 11 de outubro de 2023. O grupo municpal socialista acusou ao Goberno de Gonzalo Pérez Jácome de ocultar información esencial para que a oposición poida estudar as modificacións de crédito, que se pretenden aprobar no pleno, e de non render contas sobre o destino dunha partida orzamentaria millonaria.
“Se coas luces o argumento era o de que non teñen cartos pero queren contratalas igual, agora, ademais de non ter cartos para festas, nin se quera explica en que vai gastar o diñeiro”, expuxo a edil María Fernandez Ojea na sesión extraordinaria que tivo lugar esta mañá sobre a nula información ofrecida polo Executivo local. “En realidade, o que estamos a facer agora é habilitar crédito para financiar a campaña electoral de Democracia Orensana”, criticou despois de incidir en que non se facilita a información suficiente e requerida polos concelleiros e concelleiras da oposición.
“Ao mellor a veciñanza pensa que o que imos pagar co que pretende aprobar son festas como os magostos ou incluso o entroido, que xa pasou, porque esas son as festas tradicionais. Pero ditas celebracións teñen a súa propia partida orzamentaria habilitada con medio millón de euros, dos cales o ano pasado gastaron 405.000. Neste caso son 860.000 euros que se suman a 1,2 millóns de euros que imos gastar en no se sabe que”, insistiu sobre a modificación que non se someteu a votación ao aprobarse, por todos os grupos da oposición, a retirada da orde do día do expediente.
Ante a demagoxia do alcalde, que afirmou que retirando a cuestión se estaba a entorpecer o programa de fomento da lectura a través do cal o Concello de Ourense regala un libro a cada menor de idade da cidade, os e as socialistas lembran que as partidas poderían presentarse desagregadas para seren aprobadas de xeito individual.
“Con este expediente o que se está é malgastando diñeiro público, porque non nos di en que gastou os cartos e non sabemos a que festas se refire. Eu pensaba que a política deste Goberno era populista, darlle á xente o que quere. Pero non é populismo, senon demagoxia. E a demagoxia é un filtro distorsionador. Os datos obxectivos son absolutamente irrelevantes porque o alcalde non nos vai explicar en que se vai gastar os 2 millóns de euros da partida de actividades culturais e festivas. E dicir, que á xente lle guste a festa non xustifica o investimento público”, rematou Fernández.
