O vicepresidente segundo da Deputación e deputado de Deportes, César Fernández, participou hoxe en Castrelo de Miño na presentación das primeiras regatas nacional de Remo da tempada: o Campionato de España de Longa Distancia e o Campionato de España de Seleccións Autonómicas. Ambas competicións disputaranse este fin de semana nas instalacións do Parque Náutico de Castrelo, traendo á provincia de Ourense, aos mellores deportistas do remo nacional.
Están inscritos máis de 500 deportistas procedentes de 55 clubs para participar na proba de longa distancia que se disputará o sábado con embarcacións individuais e dobres, e case 600 pertencentes a 8 autonomías para o Campionato por Seleccións Autonómicas que se disputa en embarcacións de 4 e de 8 tripulantes na xornada do domingo. Os deportistas competirán nas categorías de: cadete, xuvenil e absoluta, tanto masculina como feminina.
