Manuel Herminio Iglesias
Todo seguirá igual nesta terra. Confírmase que os galegos somos conservadores por natureza. Cinco maiorías absolutas son moitas. Polo que dende a chegada da democracia, neste Ourense, sempre mandaron os de sempre. Na Deputación levan toda a vida e, salvando uns catro anos, nas demais institucións tamén. O PP saíu reforzado dunhas eleccións convocadas no tempo do Entroido. A mobilización que se supoñía lle daría máis votos á esquerda, resultou ser un acicate que moveu á dereita e reforzpu a súa presenza, pois o número de votos dos conservadores aumentou. O BNG mellorou moito os seus resultados, mais fíxoo, como xa aconteceu noutros procesos, a costa do PSOE. Polo que o trasvase sempre acontece no chamdo voto da esquerda. Mentres o PP non cede ningúnha papeleta. Mellor, perdendo dous escanos, aumenta o seu peso en votos nesta terra galaica. Se a caso, no único lugar onde perde algo, pero acada os mesmos representantes, é en Ourense. Pois nesta provincia o grupo de Jácome ten representación.
Atrás quedan os problemas sanitarios, as listas de espera, o voto dos populares contra a devolución da Autovia de peaxe que vai de norte a sur nesta terra, os graves problemas que ten o sector primario e o rural galego, e un sin fin de asuntos máis que non procede mentar.
Os galegos somos xente de paz, tranquila e moi comedida pra dar pasos cara ter unha mellor consideración social e reforzar o noso nivel de vida. Témoslle medo ó futuro. Somos, polo tanto, moi fieis co chamado conservadurismo que soamente oferta un continuismo raquítico e miserento.
Hai uns días, nun acto político, un candidato dicía que a Galicia faltáballe na súa estructuración política unha forza que fora quen de quitarlle votos ó PP. E poida que teña moita razón. Pois os populares semella que non teñen límite electoral nesta terra. Pois non hai quen lles entre no saco pra restarlle apoios. Certo é que a campaña moderada da señora Pontón, esquecendo soberanías e póndose a falar do que é a realidade social do país, amosou un BNG máis amabel. Un Bloque que está máis perto dos problemas dos cidadáns. Con todo dudo que eso sexa o suficiente pra manter e crear unha ilusión que os leve cara un trunfo electoral e a gobernar en san Caetano.
O trasvase de votos ven acontecendo en Galicia con certa frecuencia. Pois cando o PSOE baixa sube o BNG, e cando veñen as eleccións do Estado o voto toma outra dirección. Ben sei que entrarlle no saco ó PP semella hoxe unha tarefa moi complicada. E que o BNG, pola súa configuración interna e ideolóxica, é dificil que sexa capaz de situarse nunha liña reivindicativa que non lle meta medo e arrede do voto a moitos galegos. Tamén semella moi complicado argallar unha forza política como foi Coalición Galega pra que lle dispute o voto ós populares. Galicia, cos resultados deste 18 F, amosou que é fondamente conservadora e que non se fía das ofertas que lle fai a esquerda. Polo que o acontecido nestas eleccións debera ser motivo dunha fonda reflexión. Debera ser o acicate pra que moitos pensen no pais real e deixen de soñar cun pais imaxinario que é o que ven acontecendo hai moitos anos. Ou sexa: baixar a realidade e poñerse á altura dela e traballar por mellorala chanzo a chanzo. Pois pode que en futuras convocatorias electorais volva a acontecer o trasvase de votos sin entrarlle no saco dos votos ós populares. O camiño que marcou Ana Pontón pode ser a liña a seguir, mais aínda hai moito que pulir e moderar pra engaiolar á maioría social dos galegos.
Outros artigos de Manuel Herminio Iglesias
A opinión de Manuel Herminio: “Enfurruñados ou riquiños”
Quen fala dos problemas desta terra?
Asaltar o ceo contra o pracmatismo
A fantasía e o consumismo no Nadal
Feijoo e as maiorías absolutas
Descoñecen o que berran e chantean?
Lavándolle a faciana a extrema dereita
Moita enerxía sen rentabilidade
Ourense: Sen obxectivos nin proxectos
Ourense, por riba das ideoloxías
Vandalismo, botellóns e desleixo
Dúas maneiras de actuar na política
