Vén cargada de artigos enmarcados en campos tan diversos como a historia, o dereito, a xeografía e a diversidade sexual e de xénero
O primeiro número do 2024 xa saíu do prelo. Trátase da Mazarelos 13, a revista que arranca o quinto ano de existencia da publicación. Nesta ocasión atopamos na capa unha ilustración fermosa de Rosa de Cabanas na que aparecen dúas mulleres leiteiras cunhas contornas que se mesturan co fondo branco.
Comeza o número Amelia Fidalgo cunha entrevista a Mihaela Ciobanu pertencente á chamada “xeración coa chave ao pescozo” durante a Romanía de Ceaușescu. Segue Pablo Molejón, desde as conservas da Ría de Vigo do século pasado, para darnos a coñecer á moza Rosa Monteagudo.
Despois Sara De Torres dános a coñecer a Convención sobre a Eliminación de Todas as Formas de Discriminación contra a Muller (CEDAW), un organismo da ONU descoñecido para a maioría. Logo Aldara Castro convídanos a dar un paseo polos parques composteláns parándonos a pensar no modelo urbanístico que hai detrás da súa ordenación.
En penúltimo lugar conversamos con Pilar Cagiao e Domingo González Lopo, profesores da Facultade de Xeografía e Historia sobre o fenómeno migratorio desde a Idade Moderna. E pecha Alba Casas, integrante da Rede Galega de Estudos Queer, falando das súas orixes e do seu papel na conformación dun espazo académico coa diversidade por bandeira.
Todas as persoas que o desexen poden mercar un exemplar da revista en tenda.mazararelos.gal, ben en formato físico, ben en formato dixital.
