O grupo municipal do BNG, solicita a inmediata paralización das obras de
mellora que se están a levar a cabo nas rúas da Capela, do Canastro e Filgueiras en
Bentraces. Segundo denuncian, os traballos iniciados non atenderon as demandas da
poboación local, que pedía actuacións máis respectuosas co contorno histórico da
zona.
Barbadás, 8 de novembro do 2024.- O Bloque Nacionalista Galego solicita “a paralización inmediata das obras de mellora do firme nas rúas da Capela, do Canastro e Filgueiras en Bentraces” e unha vez paralizadas, instan “a que se inicien os contactos necesarios coa veciñanza de Bentraces, para recoller e atender as súas demandas en relación a estas obras de mellora”.
A veciñanza mostra un profundo malestar ao constatar que, a pesar da importancia patrimonial do lugar, próximo ao Pazo de Bentraces, non se tivo en conta a posibilidade de empedrar as rúas, como si se fixo en zonas históricas da Valenzá ou Parada. Ademais, a intervención non inclúe o soterramento do cableado da iluminación pública, nin se contempla a mellora das instalacións de saneamento ou a separación de augas. “Non queremos un simple
lavado de cara; pedimos que se respecte o noso patrimonio e que se atenda ás necesidades reais da veciñanza”, expón a agrupación nacionalista.
Ante a situación, o BNG de Barbadás considera que unha intervención de mellora deste tipo debería ser integral e adaptada ao valor histórico da área, e destacan a importancia de preservar o carácter histórico da vila e de responder de xeito adecuado ás necesidades da comunidade.
