A Federación Galega de Automobilismo e o Circuito Internacional de Montalegre chegaron a un acordo para que o trazado fronteirizo luso sexa o patrocinador principal do certame de montaña en 2025, pasando a denominarse Campionato Xunta de Galicia de Montaña – Circuito Internacional de Montalegre.
Despois dunha primeira experiencia na recta final da tempada pasada no certame autonómico, o goberno da localidade portuguesa confirmou e reafirmou o seu compromiso co automobilismo galego, de cara a xerar sinerxias e promocionar o deporte nos dous países.
Esta colaboración achegará a modalidade de rallycross aos afeccionados e deportistas galegos mediante a promoción dos seus eventos, que nesta tempada serán o novedoso Nitro X (un novo certame internacional de rallycross con nomes de primeiro nivel), o Campionato de España de Rallycross, as probas do Nacional portugués da modalidade e o consolidado Campionato de Portugal de drift.
Ademáis, o becado da FGA no certame de montaña en 2025, Mario Rivera, levará no seu Carcross os logotipos de Montalegre.
A ampliación deste acordo reafirma o compromiso da FGA co deporte galego, especialmente na búsqueda de novos recursos que servirán para mellorar aínda máis a modalidade de montaña.
