Ernesta Seoane, portavoz municipal do BNG de Celanova, insistiu na importancia de que os orzamentos fosen máis sociais e sostibles, e que se orientasen de maneira efectiva ás demandas da cidadanía e do persoal do municipal.
Celanova, 7 de marzo de 2025. Durante a sesión plenaria celebrada na mañá deste venres, o BNG fixo un chamamento ao Goberno Municipal e convidouno a ser máis ambicioso e a pensar máis a longo prazo, para construír un verdadeiro proxecto de futuro para Celanova.
Para Ernesta Seoane, portavoz municipal do BNG, os orzamentos municipais para o ano 2025 non responden ás expectativas e necesidades da veciñanza e non contemplan un proxecto de desenvolvemento da vila e de mellora substancial dos servizos municipais. A formación nacionalista tamén insistiu na importancia de que os orzamentos sexan máis sociais e sostibles, e que se orienten de maneira efectiva ás demandas da cidadanía e do persoal do municipal.
O BNG sinalou que o concello de Celanova ten que soportar e facer fronte cos seus propios recursos a unha serie de competencias impropias e que non lle corresponden á entidade municipal, senón que lle corresponden á Xunta de Galiza do PP. Ante este abandono da Xunta, é o concello quen ten que empregar recursos propios para afrontar competencias da Xunta como os servizos sociais, co servizo de axuda no fogar á cabeza, as escolas infantís ou o servizo de extinción de incendios , entre outros, e eses son recursos que o concello debería destinar a cuestións da súa competencia, como os servizos municipais.
Aínda que o BNG mantén unha posición crítica respecto aos orzamentos propostos polo goberno municipal, tamén recoñece a importancia de contar cun orzamento aprobado para evitar a prórroga dos anteriores, feito que complicaría a xestión municipal, limitaría a capacidade de resposta do goberno local e a veciñanza sufriría as consecuencias. Por iso, a formación nacionalista optou por unha abstención, buscando non ser un obstáculo para que Celanova dispoña dun marco orzamentario en 2025.
O BNG reafirmou o seu compromiso de fiscalizar a execución orzamentaria e de presentar propostas para optimizar a xestión dos recursos públicos. A súa posición, subliñan, non é un cheque en branco, senón un firme compromiso de traballar por unha Celanova con máis oportunidades e servizos.
Ernesta Seoane sostén que “o BNG entende a política como ferramenta de solución aos problemas e de avance social para Celanova e para o país, e actuaremos en consecuencia, pois para a veciñanza de Celanova será mellor ter estes orzamentos aprobadas, aínda que non sexan os orzamentos que o BNG faría”
