“Sorprendentemente, moitas das invitacións dos veciños e veciñas ou entidades sociais, especialmente dos pasados magostos, non chegaron a nós e descoñecemos os motivos”, sinala a edil Alba Iglesias
“Non é a primeira práctica criticada ata a saciedade que o rexedor copia ao seu antecesor no cargo”, advirte sobre un proceder que Jácome criticaba de Jesús Vázquez cando el formaba parte da iposición
Ourense, 26 de novembro de 2023. O grupo municipal socialista reclamou a relación de todos os convites recibidos por alcaldía e protocolo do Concello de Ourense dende o inicio do mandato nos que se especificou expresamente que se fixeran extensivos ao resto da corporación “e polo tanto, ao resto de grupos da oposición, en tempo e forma”, tal e como explica a edil do PSdeG Alba Iglesias.
Nesta liña, xa se rexistrou a solicitude para ter coñecemento de todas as invitacións que se realizaron a través de correo electrónico, correo postal ou calquera outro medio de envío nos últimos meses.
“Sorprendentemente, moitas das invitacións dos veciños e veciñas ou entidades sociais, especialmente dos pasados magostos, non chegaron a nós e descoñecemos os motivos”, sinala a socialista e aproveita tamén para desculpar públicamente a ausencia de representantes do grupo nalgúns actos e celebracións dos que non se trasladou información.
“Lembrámoslle a Jácome que hai 8 anos esixía a máxima prioridade neste asunto a Jesús Vázquez, exactamente o mesmo que nós. E non é a primeira práctica criticada ata a saciedade que o rexedor copia ao seu antecesor no cargo”, advirte. E remata engadindo que cando era el o que non recibía os convites cualificaba esta ocultación de información como “grave”.