Dende o Concello de Piñor infórmase da posta en marcha dunha iniciativa totalmente innovadora, destinada a fomentar o respecto e coidado ás persoas maiores, nunha época do ano tan importante como é o Nadal.
O Programa de Educación e Apoio á Familia municipal, financiado con Fondos Europeos e pola Consellería de Política Social e Xuventude, organiza esta actividade destinada a achegar os bos desexos para o Nadal a cada casa, a cada porta, sobre todo no caso das persoas maiores, que moitas veces no rural viven soas e illadas. Ademais, temos que ter en conta que o vínculo entre maiores e cativos no rural é moi plausible, sendo moitos os proxenitores que dependen da figura do avó/avoa en temas de conciliación, sendo un rol que é moi importante reforzar e destacar ante os menores, dándolle a importancia que require. Co I CONCURSO DE POSTAIS “NADAL PORTA A PORTA” preténdese obter unha postal que sexa a felicitación oficial do Concello de Piñor para chegar a cada casa, procurando que entre o Nadal en cada porta e, sobre todo, que as nosas persoas maiores se sintan acompañadas nunha época do ano tan importante coma esta. Implicando ós nenos e nenas nesta tarefa, procuramos fomentar na nosa infancia o respecto e coidado dos nosos maiores, axudándolles a producir un sorriso neste Nadal.
Os nenos e nenas interesados en participar nesta iniciativa, deben ter entre 6 e 16 anos de idade, e presentar o seu debuxo/postal no Concello de Piñor dende o 1 ó 11 de decembro ás 14h. As bases que rexen o concurso están publicadas na Sede Electrónica e nas redes sociais do concello, sendo as seguintes:
- Poderán participar nenos e nenas de entre 6 a 16 anos de idade. Os traballos deberán ser debuxos que versen sobre o Nadal.
- Os traballos deberán ter tamaño medio folio A4, en orientación vertical ou horizontal, de forma indistinta. Non poden levar datos persoais da súa autoría.
- Soamente se admitirá un traballo por participante. Deberán entregarse no Concello de Piñor, nun sobre pechado, no cal se deberá introducir:
- A postal/traballo realizado.
- Outro sobre pechado cos datos persoais do/a autor/a no seu interior: Nome, apelidos, idade, poboación e teléfono de contacto.
- O prazo de entrega dos traballos será dende o 1 ó 11 de decembro ás 14:00. O lugar de entrega é Servizos Sociais do Concello de Piñor.
- O Xurado estará composto por membros do equipo de goberno e persoal municipal vinculados coa temática do concurso: Alcalde, Concelleira de Servizos Sociais e departamento de Servizos Sociais. Valorarán dous aspectos: orixinalidade e calidade artística, de 0 a 10 puntos. O debuxo máis votado será o empregado como postal oficial do NADAL PORTA A PORTA do Concello de Piñor. En caso de empate escollerase o debuxo do participante de menor idade.
- O traballo gañador será publicado no Facebook do Concello o día 13 de decembro.
- A participación neste concurso supón a aceptación de tódalas súas bases así como da interpretación que das mesmas efectúe o Xurado.
Esperamos a máxima participación nunha iniciativa tan especial, interxeneracional, solidaria e educativa. Máis información en Servizos Sociais.
