Xulio Dobarro: “Celebración da festividade de San Marcos no Concieiro-Corneda-O Irixo “

1 Maio, 2024

Xulio Dobarro Ferradás. Profesor xubilado e veciño do Irixo

AVANTAR ACTIVIDADES

Foi este sábado, 27 de abril, cando se celebrou a festividade na honra do evanxelista San Marcos, aínda que no santoral conste o día vinte e cinco como o día propio.

O día amañeceu xiadeiro, gris e morriñento a causa das choivas intermitentes ao longo da mañá. Como xa na edición anterior do 2023 veciños da parroquia e de fóra acoden puntualmente á cita como vén sendo costume, aínda que cada ano que pasa o baleirado dalgúns lugares é máis evidente. A Galicia baleirada e o concello do Irixo sofren este andazo, case de xeito irreparable.

As imaxes que procesionaron foron a de San Mauro e a de San Marcos, aínda que como todos saben o patrón da parroquia é o Seños Santiago apóstol e como copadroa a virxe das Dores. O Santiago apóstol está presente na espadana da capela porque, ademais de ser o patrón, o antigo Camiño Real e cara Santiago abeira unha parte da parroquia e transita por diante daquela. A todo isto, recentemente se ten incorporado a identificación dos lugares polos que discorre o trazado do Camiño Nós, que, no ano Santo de 1926 realizaran os membros da Xeración Nós -fundamentalmente ourensáns- entre Ourense e Santiago. Con respecto a este camiño de pelegrinaxe cultural, despois de deixar o concello do Carballiño á altura da Insua dos Poetas, cruza A ponte do Eixán en Corneda, entre na Pedriña de Baixo (antigo Eixán), para achegarse ata o “ben chamado”“O Concieiro” -dicimos ben chamado, porque como terá observado o sempre amable lector, na senaléctica, figuran diferentes versións: Couciero, Cuncieiro, que, en todo caso o topónimo debe ir sempre acompañado do artigo “O”. Os ilustres camiñantes ao seu paso pola parroquia de Corneda fan mención da barroca igrexa parroquial, e do castro Pedroso na estrema co monte de Santiso, alá por onde chaman tamén Monte de Ollos, que como recollen algúns documentos -Catastro de Ensenada- estaba habitado ao redor de 1753 por dous veciños e contaba cunha taberna. A esa altura a parroquia de Corneda mantiña unha certa autonomía porque era un couto que non estaba incluído en ningunha das dúas xurisdicións ás que pertencían todas as demais parroquias do concello actual do Irixo: a de Orcellón do conde Monterrei e a da Encomenda de san Xoán de Xerusalén de Pazos de Arenteiro.

Como toda festividade que se prece non podía faltar a misa cantada ofrecida polo párroco actual para dez das parroquias do Irixo, don Miguel Salas, así como o acompañamento musical d´Os Galeguiños que, no momento da consagración, interpretaron o Himno Galego, ademais do acompañamento da procesión polo lugar, e unha despedida festiva con máis alegría para poder moveren os seus corpos os maís dos asistentes ao ritmo da música.

Debemos recoñecer que estas celebracións “menores”, ademais da do Concieiro, como poden ser a de Fátima na Ponte, a de Lourdes en Orros, a de San Roque na Esfarrapa, a da Candeloria na Ermida do Fondo, a de San Bertolameu en Segade ou a de Santo Antón no Tellado, e como non a da Pena da Sela, todas elas con capela propia non sería posible sen a colaboración desinteresada das persoas destes lugares nos que se ubican, cando malamente se poden ir mantendo as patronais, e que na maioría dos casos presentan ameaza de ruína se non se bota man delas.

Neste caso, especialmente, temos que agradecerlle a Juan Manuel da Pedriña, o seu traballo polifacético, porque tanto organiza e implica o vecindario como participa dos actos litúrxicos.

Outros artigos de Xulio Dobarro

Falecemento de Dª Mª Carmen Pérez Cuñarro ( 63 anos )