O equipo provincial de VOX Ourense reuniuse coa presidenta e vicepresidentes da Asociación de Novos Empresarios (AJE) de Ourense, Nuria Iglesias, José Manuel Martínez e Alba Ferro, para abordar as dificultades que atravesan os novos empresarios da provincia e expor posibles solucións.
Durante a reunión, VOX Ourense expuxo a súa proposta de acción, baseada na adopción de medidas fiscais, laborais e administrativas para axudar aos novos empresarios da provincia e así evitar a fuga de novos talentos. “As bonificacións fiscais para a creación de novas empresas, a implantación do portelo único para eliminar trabas burocráticas” ou “a axilización de programas específicos para a provincia de Ourense de formación dual”, foron algunhas das propostas presentadas pola formación.
Así llo fixo saber o presidente provincial VOX Ourense, Antonio Pérez, aos novos empresarios, que “están asfixiados” debido á crise económica e iso provoca o peche de moitos negocios. “Os polígonos de Ourense baléiranse, as empresas pechan, e as administracións non poden quedar de brazos cruzados”. Por todo iso, “os ourensáns esixen a adopción de medidas rápidas e efectivas”, remarcou Pérez.
Por outra banda, o equipo provincial de VOX felicitou aos responsables de AJE Ourense polo proxecto educativo “Aprendendo a Aprender”, que se está levando a cabo nos centros escolares da cidade e cuxo obxectivo é dar a coñecer no ámbito provincial como é o funcionamento das empresas. “Iniciativas como esta axudan a achegar ao alumnado ao mundo laboral dunha forma real e efectiva e a impulsar vocacións emprendedoras”, sentenciou Antonio Pérez.
