Onte viviuse unha mañá moi tensa na rúa Progreso de Ourense, diante da sede da Deputación, onde se concentraron os bombeiros autonómicos de Galicia, tamén os do parque do Carballiño-Ribeiro. O resumo da xornada foi unha tensa confrontación que rematou cun deles ferido no nariz na carga policial, outros nos dedos. En canto aos danos, arderon colectores, fume e lapas de lume. Segundo os datos facilitados, asistiron 200 bombeiros e 50 antidisturbios.
O presidente da Deputación de Ourense reunirse cun grupo de representantes dos bombeiros comarcais no interior do Pazo Provincial. Tras a reunión, Menor comprometeuse a esixir un servizo de calidade e a trasladar as peticións deste colectivo a nivel galego. Os bombeiros deixaron clara a súa intención de non desconvocar as próximas mobilizacións ata que teñan solución ás súas demandas. A última delas será en Santiago de Compostela, e se non conseguen solucións ameazan cunha folga de fame.
Entre as súas solicitudes figura un convenio colectivo, a nivel autonómico, unificado para todas as provincias segundo a súa profesión; emprego fixo de acordo coa doutrina do Tribunal Supremo de xaneiro de 2022; maior dotación de medios técnicos; e unha maior dotación de recursos humanos. Queren un salario digno dacordo coa perigosidade do seu traballo. Segundo os bombeiros, a Xunta considera isto inasumible, supondo 8 millóns de euros para toda a comunidade. As Deputacións piden pola súa parte responsabilidades á Xunta.
As Deputacións da Coruña, Lugo, Ourense e Pontevedra, a Xunta de Galicia e a FEGAMP condenan o uso da violencia nas protestas dos bombeiros comarcais
A Xunta de Galicia, as Deputacións da Coruña, Lugo, Ourense e Pontevedra e a Federación Galega de Municipios e Provincias (FEGAMP) expresan a súa máis rotunda condena ás manifestacións de violencia que tiveron lugar nos últimos días durante as protestas dos bombeiros comarcais en Pontevedra e Ourense e nas que resultaron feridas varias persoas e se causaron importantes danos materiais.
A Xunta de Galicia, as deputacións galegas e Fegamp entenden que calquera colectivo profesional ten dereito de reclamar melloras laborais, pero consideran inxustificable e inadmisible o uso da violencia nas protestas. Estas administracións galegas destacan tamén a actuación responsable por parte da Policía Nacional.
Imaxes como as de onte en Ourense, nas que se viu a rotura de xanelas, o uso de botes de fume e incluso o emprego de lanzachamas na vía pública; ou as de Pontevedra do pasado venres, que ocasionaron danos na fachada do Pazo Provincial, non deberían volver a producirse nunca, xa que poñen en risco a integridade das forzas e corpos de seguridade do Estado, dos traballadores e traballadoras da Deputación e das persoas que circulan pola rúa.
Xunta, deputacións e Fegamp sosteñen que o uso da forza nunca vai dobregar a defensa do interese público e instan aos bombeiros comarcais a retomar o diálogo e a negociación, como única vía posible para chegar a acordos. Consideran que ningunha demanda, por lexítima que sexa, xustifica episodios violentos como os de onte fronte á Deputación de Ourense.