Unha patrulla do Destacamento de Tráfico da Garda Civil de Verín, interceptou na tarde do mércores na autovía A52, á altura do quilómetro 160, termo municipal de Verín, a un vehículo que circulaba sentido Benavente polos carrís reservados ao sentido Vigo.
Sobre a 15:15 horas, a central operativa de tráfico avisaba da circulación dun vehículo en sentido contrario pola autovía A52, á altura da zona de Verín. Activado o protocolo establecido para o efecto, os Gardas Civís lograban interceptalo preto da saída de Verín. O condutor, que presentaba síntomas de desorientación, manifestou non acordarse do lugar concreto no que accedera á autovía, lanzando taxa negativa de alcol. Reiteradas chamadas ao 112 avisaran da circulación do devandito vehículo entre as saídas das localidades de Villaza e Verín, polo que polo menos percorrería entre 5 e 6 quilómetros en sentido contrario.
As rápidas actuacións dos Gardas Civís lograron evitar as nefastas consecuencias que a perigosa acción puido orixinar dado o gran volume de circulación no momento dos feitos. Ao condutor, un home octoxenario veciño da zona, trasladóuselle en ambulancia ao hospital de Verín e retiróuselle o vehículo da vía con posterior entrega do mesmo a uns familiares. Pola conduta descrita, a Garda Civil procedeu a confeccionar denuncia administrativa por tales feitos, así como a aprensión provisional do permiso de condución e a proposta da perda de vixencia do mesmo por carencia de aptitudes psicofísicas.
