A Garda Civil informa de que se está a detectar un aumento do número de tentativas da estafa denominada do “fillo en apuros”. A mellor maneira de evitar seres vítima dunha estafa é coñecer como se leva a cabo para poder identificala no caso de que o tenten contigo. Neste caso, a vítima recibe unha mensaxe por SMS ou máis frecuentemente Whatsapp, procedente dun número descoñecido na que unha persoa faise pasar polo seu fillo (podería ser outro familiar) e solicita axuda ante unha situación grave. Normalmente di que se perdeu ou avariou o seu móbil. Se se lle fai caso, acabará pedindo unha transferencia de diñeiro de maneira urxente. Os ciberdelincuentes proban con moitos números de teléfono, e soen atopar a alguén que cae na estafa. Se recibes algunha mensaxe deste tipo e tes dúbidas, para evitar o perigo podes seguir estes pasos: |
A) Chama ao teléfono habitual do teu fillo (ou o parente que diga ser) para comprobar se realmente hai algún problema co seu teléfono. Se está apagado ou non responde proba co paso seguinte. |
B) Realiza unha videochamada ao teléfono do que recibiches a mensaxe para comprobar que quen solicita o diñeiro é quen di ser. Deixa claro que sen videochamada non haberá máis comunicación (nin cartos). |
C) Se non é posible comprobar a identidade mediante os pasos anteriores, podes solicitar axuda e describir o teu caso: o persoal do Incibe darache consello. |
En calquera caso: Nunca envíes eses cartos sen ter seguridade completa sobre a identidade de quen cho pide: é moito máis probable que esteas a falar cunha banda de malfeitores que co teu familiar. Pon sempre o caso en coñecemento das autoridades: servirá de axuda para investigar e previr novas estafas. Lembra que podes atopar máis información e consellos sobre ciberseguridade e protección de datos no portal ciberseguridadegalicia.gal |