O Teatro Principal acolle a estrea nacional de “O dragón de ouro”, da compañía ourensá Sarabela Teatro. A presentación do espectáculo tivo lugar hoxe a cargo do vicepresidente segundo da Deputación e deputado de Cultura, César Fernández, o director da Axencia Galega das Industrias Culturais (Agadic), Jacobo Sutil; a directora do espectáculo, Ánxeles Cuña; e a directora do Teatro, Olga Mojón. O vicepresidente segundo da Deputación destacou a importancia da cooperación entre institucións en todos os ámbitos da administración, pero “este papel adquire maior relevancia no eido da cultura porque trasladámoslle á cidadanía a importancia da mesma e transmitimos a mensaxe de que a cultura ten a capacidade de crear e mover conciencia”.
César Fernández afirmou que presentar hoxe este espectáculo é “unha ledicia e un orgullo” porque “Sarabela Teatro é Ourense, un binomio que leva moitos anos coexistindo e aportando valor un ao outro”. Nese mesmo sentido, Jacobo Sutil felicitou a Sarabela por ser “unha das compañías máis importante e con máis tradición en Galicia” e animou a todos a asistir a “esta representación que induce á reflexión sobre temas sociais de relevancia”.
A directora do espectáculo dixo que era “unha felicidade estrear na casa” e presentar por primeira vez en Galicia e en galego a un autor como Roland Schimmelpfennig, un dos máis representados a nivel internacional. “Trátase dunha obra con “moito valor cultural, artístico e social que aborda temas de actualidade”, sinalou Ánxeles Cuña.
“O dragón de ouro” estrearase o 23 de febreiro, ás 20.00 horas, con funcións o día 24 á mesma hora, e o día 25 de febreiro ás 19.00 horas.
