A Axencia de Doazón de Órganos e Sangue convida á cidadanía galega a doar sangue nos días previos á primeira fin de semana longa de decembro. Neste momento, é necesario aumentar o número de doazóns dos tipos A Positivo, Cero Positivo e Cero Negativo, xa que, nas últimas semanas, detectouse un aumento da demanda destes grupos sanguíneos.
As pontes festivas e os períodos vacacionais requiren un reforzo no chamamento á cidadanía xa que, nestas épocas do ano, o número de doazóns pode diminuír pero non ocorre o mesmo coa demanda de compoñentes sanguíneos por parte dos hospitais. Neste sentido, lembra que cada día Galicia precisa entre 400 e 500 doazóns de sangue para garantir o bo funcionamento dos centros de saúde galegos.
As dez unidades móbiles da Administración de Órganos e Sangue visitarán, durante os próximos días, máis de 30 concellos galegos e tamén se poderá colaborar nos hospitais.
